Memleket basshysy Shymkent halqynyń iskerligin aıryqsha atady

ASTANA. QazAqparat – QR Prezıdenti Qasym-Jomart Toqaev Shymkent halqynyń iskerligin aıryqsha atap, ońtústik halqyna eńbekqorlyǵy úshin rızashylyq bildirdi, dep habarlaıdy QazAqparat tilshisi.

«Sońǵy jyldary shaǵyn jáne orta kásipkerliktiń jalpy óńirlik ónimdegi úlesi 40 paıyzǵa jetti. Bul – jaqsy kórsetkish. Osy salada 180 myńǵa jýyq adam jumys isteıdi. Osy tusta Shymkent halqynyń iskerligin aıryqsha atap ótkim keledi», - dedi Memleket basshysy.

Sondaı-aq Prezıdent bul óńirdiń halqy qashannan eńbekqor ekenin atap ótti.

«Jalpy, ońtústik halqy qashanda eńbekqorlyǵymen tanymal bolǵan. Bul qasıetterińiz – kópshilikke úlgi-ónege. Halqymyz «Eńbek – yrystyń qazyǵy» degen. Men adal eńbekpen elimizdi damytýǵa qosqan úlesterińiz úshin ózderińizge shynaıy rızashylyǵymdy bildiremin», – dedi Qasym-Jomart Toqaev.

Aıta keteıik, búgin Memleket basshysy Qasym-Jomart Toqaev Shymkent qalasynyń jurtshylyǵymen kezdesti.

Foto: akorda.kz