Memleket basshysy shetelde júrgen talantty qazaqtardy elge shaqyrdy

ASTANA. QazAqparat - Tarıhı otanyma eńbek sińiremin degen ár talantty qazaqty elge jeke shaqyramyn. Búgin elordadaǵy Táýelsizdik saraıynda ótken Dúnıejúzi qazaqtarynyń V quryltaıynda Qazaqstan Prezıdenti Nursultan Nazarbaev osylaı dedi, dep habarlaıdy QazAqparat.

"Kez kelgen memleket kásibı jańashyl mamandarǵa muqtaj. Tarıhı Otanyma eńbek sińiremin, onyń damýyna úles qosamyn degen  ár talantty qazaqty elge jeke shaqyramyn. Men bilemin, jeke tizimi de bar, shetelde jeke kezdesýim de bar. Kezinde jaǵdaısyz kóship ketken. Ǵalym bolyp,  zerthanalarda jumys istep júrgen azamattarymyz bar. Menińshe, olardyń elge keletin yntasy bar", - dedi Memleket basshysy.

QR Prezıdenti sol azamattardy elge shaqyryp, eńbek etýge jaǵdaı jasaý qajettigin basa aıtty.

"Úkimet osyndaı azamattardy elge tartyp, mamandyǵyna, múmkindigine qaraı jaǵdaı jasaýdyń tetikterin qarastyrsyn. Biraq keıde shaqyramyz, keledi. Anda júredi, mynda júredi, eshqaıda qabyldanbaı qaıtyp ketedi. El basqaryp otyrǵan azamattarǵa, mınıstrlerge osyny (mundaı jaǵdaıǵa jol bermeýdi - red.) tapsyramyn", - dedi Elbasy.