Memleket basshysy Sharyn shatqalynda qaza tapqan Mereı Ibragımovtiń jaqyndaryna kóńil aıtty
NUR-SULTAN. QazAqparat – Memleket basshysy Qasym-Jomart Toqaev Sharyn shatqalyndaǵy qaıǵyly oqıǵa kezinde qaza tapqan Mereı Ibragımovtiń jaqyndary men týystaryna kóńil aıtty. Bul týraly QR Prezıdentiniń baspasóz hatshysy Berik Ýálı Facebook paraqshasynda jazdy, dep habarlaıdy QazAqparat.
Memleket basshysy 29 mamyr kúni Almaty oblysyndaǵy Sharyn shatqalynda bolǵan qaıǵyly oqıǵany úlken kúızelispen qabyl aldy. Qasym-Jomart Toqaev qaıtys bolǵandardyń jaqyn týystaryna kóńil aıtyp, jaraqat alǵandardyń tezirek saýyǵyp ketýine tilektestik bildirdi.
«Shákirtterin qutqaramyn dep ózi qurban bolǵan bilikti maman Mereı Nurǵazyuly ómirin ustazdyqqa arnady. Oqýshylarynyń súıikti muǵalimi boldy. Tabıǵat tosyn minez kórsetken apatty jaǵdaıda jas ustaz batyldyq tanytyp, oqýshysyna jankeshtilikpen kómek kórsetýge umtyldy. 26 jasynda ómirden qyrshyn ketken Mereı Nurǵazyulynyń erligi men jarqyn beınesi umytylmaıdy», – delingen kóńil aıtý jedelhatynda.
Memleket basshysynyń Jarlyǵymen adam ómirin saqtap qalýǵa baılanysty qıyn-qystaý jaǵdaıda kórsetken erjúrektigi men janqııarlyǵy úshin marqum Mereı Ibragımov «Erligi úshin» medalimen nagradtaldy.
