Memleket basshysy: Saılaý nátıjesin halqymnyń batasy dep bilemin
ASTANA. QazAqparat – Memleket basshysy QR Prezıdentin ulyqtaý rásiminde aldaǵy 7 jyldy búgingi býynnyń jáne keleshek urpaqtyń aldyndaǵy boryshymdy óteýge kúsh salatynyn málim etti, dep habarlaıdy QazAqparat tilshisi.
«Shyn máninde, el senimin esh nársemen ólsheý múmkin emes. Halyqtyń senimi – eń qundy nárse. Saılaý nátıjesin halqymyzdyń saıası baǵdaryma – baǵasy, aldaǵy josparyma – batasy dep qabyldaımyn. Halqynyń qoldaýyna ıe bolyp, el tizginin ustaý – er azamat úshin eń bıik mártebe ári orasan zor jaýapkershilik», - dedi Prezıdent.
Qasym-Jomart Toqaev halyqtyń senimin ózine berilgen amanat dep qabyldaıtynyn atap ótti.
«Aldaǵy 7 jyldy búgingi býynnyń jáne keleshek urpaqtyń aldyndaǵy boryshymdy óteýge berilgen biregeı múmkindik dep bilemin. Qazaqta «amanat» degen asyl uǵym bar. Halqymnyń senimi – maǵan amanat. Osy amanatqa adal bolý – men úshin qasıetti paryz. El úmitin aqtap, Qazaqstandy órkendegen, baqýatty memleketke aınaldyrý úshin qolymnan kelgenniń bárin jasaımyn», - dedi Memleket basshysy.
Eske salsaq, QR Ortalyq saılaý komıssııasynyń shyǵarǵan qorytyndysy boıynga 20 qarashadaǵy kezekten tys prezıdent saılaýynda kandıdat Qasym-Jomart Toqaev saılaýshylardyń 81,31 paıyz daýysyn jınap, jeńiske jetken bolatyn.
Osyǵan baılanysty Ortalyq saılaý komıssııasy QR Prezıdentiniń ant berý kúnin 26 qarashaǵa belgilegen edi.
