Memleket basshysy saıası júıeni ózgertýdi ózinen bastap otyr – depýtat
«Bıyl 1-qyrkúıekte Memleket basshysy Qasym-Jomart Toqaev Qazaqstan halqyna Joldaýynda Prezıdenttiń mandatyn qaıta saılaý quqyǵynsyz, 7 jyldyq bir merzimmen shekteý týraly usynys aıtty. Bul bastama el arasynda, sarapshylar ortasynda jáne áleýmettik jelilerde qyzý talqylandy. Túrli pikirler týyndady. «Prezıdent bes jylǵa bir, sosyn jeti jylǵa bir ret qaıta saılana ma?» degen suraqtar da bolmaı qalǵan joq. Jalpy respýblıka jurtshylyǵy bul usynysty negizinen izgilikti demokratııalyq qadam dep baǵalap, qoldady. Alaıda, jasyratyny joq, «bul ózgerister taıaý merzimde júzege aspaıdy» deýshiler de boldy. Kúdik pen senimniń taıtalasy bolǵandyqtan, Parlament Májilisiniń depýtattary Prezıdent saılaýyn merziminen buryn ótkizý týraly usynys engizdi, ol jańa úlgi boıynsha, Prezıdentti ekinshi merzimge qaıta saılaý quqyǵynsyz, 7 jyldyq bir merzimge saılaý tásilimen ótedi. Sol sebepti, Konstıtýtsııaǵa Prezıdent saılaýy ótkennen keıin emes, oǵan deıin tıisti ózgerister engizý usynylyp otyr. Bul óz kezeginde joǵaryda aıtylǵan máseleni quqyqtyq jolmen retteıdi», – dedi depýtat «Qazaqstan Respýblıkasynyń Konstıtýtsııasyna ózgerister men tolyqtyrý engizý týraly» zań jobasyn talqylaý barysynda.
Onyń atap ótýinshe, prezıdenttik ókilettiktiń jalpy merzimi eki merzimnen bir merzimge, ıaǵnı 10 jyldan 7 jylǵa deıin qysqarady. Bul bıliktiń jańa jáne ádil tepe-teńdigin ornatady.
«Bir rettik jeti jyldyq merzimniń mánisi nede? Memleket basshysy búkil saıası júıeni ózgertýdi ózinen bastap otyr. Soǵan baılanysty memlekettik qurylymdaǵy reformalar jańa erejeler boıynsha júrgiziledi. Atalmysh ózgeris ádiletti Qazaqstannyń bolashaǵyna jol ashar quqyqtyq norma! Bul norma el tizginin ustar jańa saıasatkerler men jańa saıası lıderlerdiń, sondaı-aq beti ashyq, júzi jaryq, Ary men alaqany taza, elmen etene aralasa jumys isteıtin, halyqty tyńdatatyn, ózi de tyńdaı biletin jańa býynnyń kelýine múmkindik beredi. Quqyqtyq demokratııanyń bul úlgisi jańa saıası tulǵalardyń joǵary laýazymdy bılikke qol jetkizýin qamtamasyz etedi. Hakim Abaıdyń sózimen aıtqanda, «eńbegin satyp» el tizginin ustar ustanymy berik jastar saıasat arenasyna shyǵady. Sonymen qatar, bul – eldiń ishin alataıdaı búldirip, kósh sońynda «úrıt-soqtap» júretin emes, ár salada kóshti bastaıtyn jańa tulǵalar qalyptastyrýǵa jasalǵan naqty qadam. Bul ózgerister barlyq saıası júıeniń jańa tártip boıynsha jańarýyna bastaıtyn jol», – dedi Janarbek Áshimjan.
Depýtattyń aıtýynsha, prezıdenttik merzimniń bir rettik qana bolýy Konstıtýtsııanyń jańa erejeleriniń ózgermeıtindigin belgileýmen qamtamasyz etiledi. Qazaqstan Respýblıkasynyń Konstıtýtsııasy 91-babynyń 2-tarmaǵynda belgilengen memlekettiń táýelsizdiginen, Respýblıkanyń birtutastyǵy men aýmaqtyq tutastyǵynan, ony basqarý nysanynan basqa, qaıta saılaý quqyǵynsyz bir rettik 7 jyldyq prezıdenttik merzim týraly jańa norma qosylady, ol tıisinshe Konstıtýtsııanyń ózgermeıtin prıntsıpteri bolyp qalady.
«Prezıdenttik laýazym – eń aldymen uly jaýapkershilik. Búkil halyqtyń, tutas memlekettiń tizginin ustaıtyn tulǵa bilimdi, bilikti bolýmen qatar asa jaýapkershilikte bolýy shart. Sóz ben is úılesýi kerek. 7 jyldyq merzim kez kelgen memleket basshysy úshin saılaýaldy baǵdarlamasyn múltiksiz oryndaýǵa jetkilikti merzim. Bılik – som altyn sııaqty. Kózdi de kóńildi de arbaıdy. Sondyqtan bıliktiń maıly jiliginen aırylmaýdy ańsaıtyndardyń endigi tańda joly kesiledi», – dedi ol.
Foto: amanatpartiasy.kz
