Memleket basshysy referendýmǵa qatysty sońǵy sózdi Kostıtýtsııalyq keńestiń sheshiminen keıin ǵana aıtady
ASTANA. 28 qańtar. QazAqparat /Aıdar Ospanalıev/ - Búgin Parlament palatalarynyń birlisken otyrysynda Memleket basshysy Nursultan Nazarbaev referendým ótkizý týraly sheshimdi onyń zańdylyǵyn Kostıtýtsııalyq keńes tekserip, anyqtaǵannan keıin ǵana qabyldaıtyndyǵyn aıtty.
«Men ózimniń Jarlyǵymmen Parlamenttiń referendým ótkizý jónindegi usynysyn qabyl almadym. Óıtkeni men 2012 jyly ótetin Prezıdent saılaýyna qatyspaqshy edim. Parlament óziniń ókilettigin paıdalana otyryp, Konstıtýtsııaǵa ózgerister men tolyqtyrýlar engizý týraly zań qabyldady. Men bul zańdy Konstıtýtsııalyq keńeske joldadym. Konstıtýtsııalyq keńes osy zańnyń elimizdiń zańdary men Ata zańymyzǵa saı ekendigin anyqtaǵannan keıin ǵana sońǵy sheshim qabyldanady. Men bul laýazymda biraz ýaqyttan beri qyzmet etip kelemin. Biz barlyq qıyndyqtardy birge ótkizdik, kúrdeli degen máselelerdi birge sheshtik. Osy ýaqytta halyq menimen birge boldy. Bul kez-kelgen saıasatker úshin, ásirese Prezıdent úshin eń úlken madaq. Men, eń bastysy halyqtyń «Laýazymyńnan bas tartpa, qyzmetińdi jalǵastyr!» - dep otyrǵanyn túsindim», -dedi Prezıdent.
