Memleket basshysy Prezıdenttik kadrlyq rezerv qurylatynyn málimdedi
NUR-SULTAN. QazAqparat - Memleket basshysy Qasym-Jomart Toqaev Prezıdenttik kadrlyq rezerv qurý arqyly jas ári daryndy jastarǵa qoldaý kórsetiletinin málim etti, dep habarlaıdy QazAqparat tilshisi.
«Meniń eń basty mindetim - sizder eń basty armandaryńyzdy oryndaı alatyndaı jaǵdaı jasaý, ózińizdiń jetistik jolyńyz týraly jaza bilýge múmkindik jasaý. Memlekettik qyzmettiń barlyq deńgeıinde jańa daryndy basqarýshylardy qoldaý úshin Prezıdenttik kadrlyq rezerv qurylady. Bizdiń jastar - óte daryndy ári kreatıvti, maqsatqa umtylyp turady. Sol sebepti, Qazaqstannyń bolashaǵy senimdi qolda dep aıta alamyn», - dedi Qasym-Jomart Toqaev elordadaǵy ulyqtaý rásiminde.
Aıta ketsek, elordada jańadan saılanǵan QR Prezıdenti Qasym-Jomart Toqaevty ulyqtaý rásimi ótip jatyr. Sharaǵa Úkimet músheleri, Parlament depýtattary, Konstıtýtsııalyq Keńes músheleri, Joǵarǵy Sot sýdıalary, Qazaqstanda tirkelgen dıplomatııalyq korpýs ókilderi jáne basqa da shaqyrylǵan qonaqtar qatysýda.
Táýelsizdik saraıynda Qasym-Jomart Toqaev Qazaqstan halqyna ant berdi. Ant bergen sátten bastap jańadan saılanǵan Prezıdent resmı qyzmetine kirisken bolyp sanalady.
