Memleket basshysy Pavlodar alıýmınıı zaýytyna bardy
Kásiporyn jetekshisi Roman Romanov Memleket basshysyna oblystyń metallýrgııalyq klasterindegi kásiporyndar shyǵarǵan daıyn ónimderdi tanystyrdy. Bul jerde bastapqy alıýmınııden bastap alıýmınıı radıatorlaryna jáne avtomobıl dıskilerine deıingi túrli ónim qamtylǵan. «Qazaqstan alıýmınııi» AQ 8 myńǵa jýyq adamdy jáne olardyń otbasyn turaqty jumyspen qamtamasyz etip, olardyń áleýmettik jaǵdaıyna kóńil bólip otyr.
Budan keıin Eýrazııalyq toptyń basqarma tóraǵasy Serik Shahajanov Qasym-Jomart Toqaevqa ERG ónerkásiptik kásiporyndarynyń shyǵaratyn qaldyqtaryn kezeń-kezeńmen qysqartýdy kózdeıtin Ekologııalyq strategııanyń júzege asyrylýy jóninde aıtty. 2030 jylǵa deıin qatty qaldyqtardyń kólemin 50 myń tonnaǵa (57 paıyzǵa) azaıtý josparlanyp otyr. Zaýyttar men jylý elektr stansalaryndaǵy súzgiler aýystyrylady, kúl jınaıtyn qondyrǵylar salynady jáne kómirteginen aryltý jobalary júzege asyrylady. Sondaı-aq Eýrazııalyq top aldaǵy 3 jylda 420 myń aǵash egýdi josparlap otyr. Onyń jartysynan kóbi Pavlodar oblysynda egiledi. Sonymen qatar kompanııa Qostanaı oblysynda bolǵan órtten keıingi orman alqabyn qalpyna keltirýge qosymsha 1 mıllıard teńge bóldi.
Sonymen qatar Prezıdentke kompanııanyń áleýmettik mindettemelerin oryndaý barysy, onyń óńirlerdegi «Halyqtyń bıýdjetke aralasýy» bastamasy, jergilikti turǵyndardyń áleýmettik túsinigi men proaktıvtiligin arttyrý, ınnovatsııalyq qyzmet úshin jaǵdaı jasaý jáne bıznestiń áleýmettik jaýapkershiligi jónindegi basqa da jobalar týraly baıandaldy.
Budan keıin «Qazaqstan alıýmınııi» AQ eńbek ujymymen emen-jarqyn áńgimelesken Qasym-Jomart Toqaev aktsıonerlerdiń barlyq áleýmettik mindettemesin oryndaýynyń mańyzdy ekenin atap ótti.
– Sizder Qazaqstan Respýblıkasy ındýstrııasynyń flagmany sanalatyn óte mańyzdy kásiporynda jumys isteısizder. Men jańa ǵana prezentatsııalardy kórdim. Kásiporynnyń qyzmetimen tanyspyn. Munda adamdardyń qalaı jumys isteıtinin jáne qandaı ónimder shyǵaratynyn bilemin. Olar Qazaqstan Respýblıkasyna qajet jáne shetelde úlken suranysqa ıe. ERG toby kásiporyndarynyń basshylyǵy áleýmettik máselelerdi sheshýge, áleýmettik baǵdarlamalardy iske asyrýǵa jáne tıisti nysandardyń qurylysyna erekshe nazar aýdarady. Osy oraıda biz árqashan qoldaımyz. Sizderge sáttilik tileımin! – dedi Prezıdent.
Foto: akorda.kz
