Memleket basshysy: Partııaǵa jańa mádenıet kerek
Prezıdent partııa rebrendıngi onyń ataýy men jazylýyn ózgertýdi ǵana bildirmeıtinin atap ótti. Birinshi kezekte barsha partııalyq jumysty qaıta qurý kerek.
Aıtylǵan usynystardy qoldaı otyryp, partııa Tóraǵasy biqatar basym mindetti aıqyndap berdi.
Onyń pikirinshe, eń aldymen, ortalyqqa táýeldilikti joıý jáne partııa apparatynyń tıimdiligin arttyrý qajet.
«Partııa apparatynyń jumysynda bıýrokratııanyń teris sıpattary anyq kórindi. Jelilik kesteler, esep berý jáne qaǵaz júzindegi is-sharalar saılaýshylarmen tikeleı jumys isteýdi ekinshi orynǵa syrǵytty. Jumysqa qulshynyp turǵan azamattar óz oryndaryn darynsyz fýnktsıonerlerge berýge májbúr boldy», - dedi Prezıdent.
Memleket basshysynyń paıymynsha, ortalyq apparattyń fılıaldarmen jáne bastaýysh partııalyq uıymdarmen ózara is-qımyl ádisterin tolyǵymen qaıta qaraý qajet.
«Bıýrokratııa men qaǵazbastylyqtan úzildi-kesildi bas tartý kerek. Aımaqtyq fılıaldar men bastaýysh uıymdary saılaýshylarmen ózdiginen jumys isteı alady jáne jumys isteýge mindetti. Ortalyq apparat nusqaýshylyq jáne «qolmen» basqarý tájirıbesinen arylýǵa tıis. Onyń maqsaty – jalpy partııalyq vektordy qurý, ádistemelik ári ıdeologııalyq qoldaýdy qamtamasyz etý, kadrlardy oqytý, júıeli problemalardy taldaý. Partııaǵa senim men yntymaqtastyqqa negizdelgen qarym-qatynastyń jańa mádenıeti kerek», - dedi Qasym-Jomart Toqaev.
