Memleket basshysy: Otandyq ónimderdi paıdalanýdy bilmeımiz
«Qazaqstanda tigýge bolatyn kıim-keshek pen qaıdaǵy joq shurym-burymdy ımporttap otyrmyz. «Atameken» buǵan basa nazar aýdarýy tıis. Biz bulttardyń ústinde qalyqtap, zaýyt salý qajet, kólik jasaý qajet deımiz. Al adamdar qarapaıym dúnıelerdi bilmeıdi. Barlyǵymyz da sheteldik qymbat kıimderdi kıemiz. Sony ózimizdiń ishimizde nege óndirmeske? Búginde bizdiń jeńil ónerkásip kásiporyndarymyz óte jaqsy taýar shyǵaratyndyǵyn bilemin. Biz jarnamalaýdy bilmeımiz, otandyq ónimderdi paıdalanýdy bilmeımiz», - dedi Nursultan Nazarbaev.
Sonymen qatar Memleket basshysy qazaqstandyq tıtannyń álemdik naryqtaǵy úlesi 1,6 esege ulǵaıǵanyn atap ótti. Elimizde altyn óndirý kólemi aldaǵy ýaqytta jylyna 80 tonnadan astamdy quraıtyndyǵyn aıtty.
«Bizdiń mashına jasaý salamyz da qarqyndy damyp kele jatyr. Mashına jasaý salasy bolsa, onda jańa taýar, jańa ónim bolady. Demek, bizdiń kásiporyndarymyz jańǵyrady. Bul saladaǵy eńbek ónimdiligi 2,6 ese ulǵaıdy. Búginde elimizdiń ishinde satylǵan jeńil jáne júk kóliktiń ár ekinshisi otandyq kásiporyndarda shyǵarylǵan», - dedi Elbasy.
