Memleket basshysy óńirlerdegi sý tasqynynyń aldyn alýdy tapsyrdy
NUR-SULTAN. QazAqparat - Memleket basshysy Qasym-Jomart Toqaev óńir ákimderiniń qatysýymen ótken keńeste sý tasqynynyń aldyn alý boıynsha jumys isteýdi tapsyrdy. Bul týraly Aqordanyń baspasóz qyzmeti habarlaıdy.
«Prezıdent ótken jyly Qazaqstannyń 5 óńirinde myń jarymǵa jýyq turǵyn úıdi sý alǵanyn basa aıtty. Osyǵan baılanysty Úkimet pen ákimderge aımaqtardaǵy sý tasqynynyń aldyn alý úshin der kezinde shara qabyldaý tapsyryldy», - dep jazdy baspasóz hatshysy.
Sonymen birge, keńeste kóktemgi egis jumystaryna da kóńil bólindi. Bul turǵyda Memleket basshysy joǵary sapaly tuqymdarmen, tyńaıtqyshtarmen jáne janar-jaǵarmaı materıaldarymen qamtamasyz etý jumystaryn baqylaýda ustaýdy tapsyrdy.
«Qarjylyq qıyndyqtardy bastan keshiretin problemalyq iri agroholdıngter men sharýashylyqtarǵa kóńil bólý qajet. Úkimetke jáne ákimderge kóktemgi egistik jumystaryna muqııat daıyndalýdy jáne sapaly júrgizýdi, barlyq egistik jerlerdi barynsha aınalymǵa tartýdy tapsyramyn», - dedi Memleket basshysy.
