Memleket basshysy Nursultan Nazarbaevty prezıdenttik saılaýdaǵy senimdi jeńisimen Reseı Federatsııasynyń Prezıdenti Dmıtrıı Medvedev quttyqtady
ASTANA. 4 sáýir. QazAqparat - Memleket basshysy Nursultan Nazarbaevty prezıdenttik saılaýdaǵy senimdi jeńisimen Reseı Federatsııasynyń Prezıdenti Dmıtrıı Medvedev quttyqtady. Bul týraly QR Prezıdentiniń baspasóz qyzmeti habarlady.
Jedelhat mátininde bylaı delingen:
Qurmetti Nursultan Ábishuly!
Qazaqstan Respýblıkasy Prezıdenti qyzmetine qaıta saılanýyńyzǵa baılanysty shyn júrekten shyqqan quttyqtaýymdy qabyl alyńyz.
Saılaýdaǵy senimdi jeńisińiz Sizdiń óz halqyńyzdyń shynaıy kóshbasshysy retindegi abyroı-bedelińizdi aıqyn kórsetti. Dostas Qazaqstan sońǵy jyldary qol jetkizgen áleýmettik-ekonomıkalyq saladaǵy, memlekettik qurylystaǵy, halyqaralyq arenadaǵy aıtarlyqtaı tabystar Sizdiń jalpyulttyq qoldaý men senimge ıe bolýyńyzdy qamtamasyz etti.
Tatý kórshilestik pen ózara qurmettiń berik úrdisine negizdelgen, reseılik-qazaqstandyq strategııalyq seriktestikti odan ári tereńdetý máselesindegi Sizdiń ózgermeıtin kóńilińizdi joǵary baǵalaımyn. Eki jaqty kúsh-jigerdiń arqasynda kópjosparly ekijaqty ózara is-qımylymyz odan ári qarqyndy damyp, jańa aýqymdy jobalarmen baıı túsetinine kúmán keltirmeımin.
Qazaqstannyń óńirlik ıntegratsııalyq yntymaqtastyqty damytýǵa arnalǵan údemeli baǵyty jalpyǵa ortaq tanymaldyqqa ıe. Bizdiń elderimizdiń Keden odaǵynyń jumysyn qamtamasyz etý máselesinde jáne EýrAzEQ aıasynda Biryńǵaı ekonomıkalyq keńistikti qalyptastyrýda, TMD, UQShU men ShYU jelileri boıynsha baılanystardy nyǵaıtýdaǵy kózqarastardy tyǵyz úılestirýi birneshe ret óziniń tıimdiligin kórsetti. Bizdiń birlesken jumysymyzdyń kelesi ıntegratsııalyq kezeńge - Eýrazııalyq ekonomıkalyq odaqqa ótýin jalǵastyrý mańyzdy.
Reseılik-qazaqstandyq odaqtastyq qatynastardyń orasan áleýeti alda da bizdiń elderimizdiń halyqtarynyń múddelerin, eýrazııalyq keńistikte turaqty damý men qaýipsizdikti qamtamasyz etýde tabysty iske asatynyna senemin.
Myqty densaýlyq jáne keleshekte tabystar tileýshi nıetpen,
Reseı Federatsııasynyń Prezıdenti
Dmıtrıı Medvedev
Máskeý, Kreml, 2011 jylǵy 4 sáýir.
