Memleket basshysy Nursultan Nazarbaev Ujymdyq qaýipsizdik týraly Shart Uıymynyń bas hatshysy Nıkolaı Bordıýjany qabyldady
ASTANA. 12 qarasha. QazAqparat. N.Bordıýja Prezıdentke bıylǵy jylǵy 10 jeltoqsanda Máskeýde ótetin UQShU ujymdyq qaýipsizdik Keńesiniń otyrysyna ázirlik barysy týraly aıtty.
Kezdesý barysynda N.Bordıýja Qazaqstannyń EQYU-ǵa tóraǵalyǵyna joǵary baǵa berdi.
- Qazaqstannyń EQYU-ǵa tóraǵalyǵy ortaq tańdanysty týdyrady, - dedi N.Bordıýja.
Kezdesýden keıin jýrnalısterge arnalǵan brıfıngte N.Bordıýja bıylǵy jyl EQYU úshin serpindi jyl bolǵanyn atap ótti.
- Bul Qazaqstannyń EQYU-ǵa tóraǵalyǵy aıasynda qaýipsizdikti qamtamasyz etýge qatysty óte mańyzdy is-sharalardy kóptep ótkizýine baılanysty boldy. Sonymen qatar, bul osy tóraǵalyq aıasynda óte ótkir máseleler qozǵalǵanyna jáne olardyń sheshilýinde qarqyn barlyǵyna baılanysty bolyp otyr. Alaıda, eń basty kórsetkish - ol aldaǵy ýaqytta 11 jylǵy úzilisten keıin ótetin EQYU-nyń sammıti. Onyń ústine, bul sammıt EQYU-ǵa múshe elderdiń kóptegen memleket basshylarynyń qatysýymen ótetin bolady. Bul - serpilis, - dedi UQShU-nyń bas hatshysy.
Sondaı-aq N.Bordıýja Qazaqstannyń EQYU-ǵa tóraǵalyǵy UQShU-ǵa múshe memleketterdiń keńistigindegi qaýipsizdik júıesine tıisinshe yqpal etetinine toqtalyp ótti.
- Qazaqstannyń EQYU-ǵa tóraǵalyǵy kezeńinde Qyrǵyz Respýblıkasyndaǵy oqıǵalar bolyp ótti jáne Qazaqstannyń tóraǵalyǵymen Qyrǵyzstandaǵy problemalar sheshimin tapty. Munyń mańyzdylyǵy sonda, EQYU óz jumysy aıasynda alǵash ret óz qyzmetin UQShU-men jáne ózge de halyqaralyq qurylymdarmen úılestire aldy. Bizdiń ókilderimiz Qyrǵyzstandaǵy qaıǵyly oqıǵalar barysynda qyrǵyz halqyna kómek kórsetý úshin turaqty túrde kezdesýler ótkizdi, ózderiniń saraptamalary boıynsha aqparattar almasty, eń tıimdi sharalardy talqylady. Bul óte mańyzdy ári nátıjeli boldy, - dedi N.Bordıýja.
UQShU-nyń bas hatshysy Qazaqstannyń EQYU-ǵa tóraǵalyǵy kezeńinde bes halyqaralyq uıymdardyń - BUU, EQYU, NATO, UQShU jáne TMD-nyń joǵary laýazymdy tulǵalarynyń kezdesýleri birinshi ret ótkizilgenin atap kórsetti.
- EQYU-nyń Astanadaǵy Sammıti aıasynda osy bes uıymnyń laýazymdy tulǵalarynyń ekinshi kezdesýi ótkizilmekshi. Al, bul qaýipsizdik máselelerine mamandandyrylǵan halyqaralyq uıymdardyń qyzmetin úılestirý ońalyp kele jatqandyǵyn kórsetedi, - dedi óz sózinde N.Bordıýja.
