Memleket basshysy Nursultan Nazarbaev Almaty, Pavlodar jáne Batys Qazaqstan oblystarynyń mádenıet kúnderine arnalǵan is-sharalarǵa qatysty

Sharalar Beıbitshilik jáne kelisim saraıynda bolyp ótti. PrezıdentAlmaty, Pavlodar jáne Batys Qazaqstan oblystarynyń jetistikter kórmesimen tanysty. Kórmeniń maqsaty - Qazaqstan oblystarynyń Táýelsizdiktiń 20 jylynda ekonomıka, áleýmettik jáne mádenı salalardaǵy jetistikterin kórsetý.

Memleket basshysy Almaty oblysy qol jetkizgen nátıjelerdiń qorytyndysyna arnalǵan kórmemen tanysty. Oblys ákimi A. Musahanov Memleket basshysyna óńirdiń ekonomıkalyq jaı-kúıi men damýy týraly baıandady. Táýelsizdik jyldarynda oblysta ómir súrý deńgeıiniń barlyq salasyna arnalǵan aýqymdy jańarýlar júrgizildi. 2011 jyly oblysta jalpy óńirlik ónimdi 1056,9 mlrd. teńgege deıin, turǵyndardyń jan basyna shaqqanda 560,9 myń teńgege deıin jetkizý josparlanýda. 1987 jylmen salystyrǵanda, jalpy óńirlik ónim 11,2 ese, turǵyndardyń jan basyna shaqqanda 8,9 esege ósti. Oblys respýblıkadaǵy iri agroındýstrııalyq óńirdiń birinen sanalady. Óıtkeni jalpyrespýblıkalyq kólemniń agrarlyq sektor boıynsha jalpy óniminiń 16 paıyzǵa jýyǵy osy oblysta óndiriledi. 2010 jyly aýyl sharýashylyǵy jalpy óniminiń kólemi 227,8 mlrd. teńgege jetip, 1991 jylǵy deńgeıden 69 ese ulǵaıdy. Aǵymdaǵy jyly ónerkásip óndirisiniń kólemin 359,4 mlrd. teńgege jetkizip, 1996 jylǵy kórsetkishten 16,6 esege arttyrý josparlanýda.

Sońǵy 10 jylda oblysta 867 jańa nysan paıdalanýǵa berilip, 21 myńnan astam jumys orny ashyldy. Belsendi shaǵyn jáne orta bıznes sýbektileriniń sany 1998 jylǵy 30 myńnan 2010 jyly 108 myń birlikke deıin ulǵaıdy. Aǵymdaǵy jyly Indýstrııalandyrý kartasy aıasynda somasy 216,9 mıllıard teńgeniń 12 nysanyn paıdalanýǵa berý josparlanǵan, onyń ishinde birinshi jartyjyldyqta 5 nysan paıdalanýǵa berildi. Ekinshi jartyjyldyqta óńirlik karta aıasynda 5 nysandy jáne respýblıkalyq karta boıynsha 2 jobany iske qosý qarastyrylǵan. Ol Qorǵas - Jetigen jáne Moınaq SES qurylysy. 195 kitaphana, 185 mádenıet úıi jáne 13 murajaı, 2 kartınalar galereıasy, oblystyq halyq shyǵarmashylyǵy ortalyǵy men tarıhı-mádenı murany qorǵaý jónindegi oblystyq ortalyq ashyldy. Tilder saraıy, Taldyqorǵan qalasynda dostyq úıi jáne 5 mádenıet nysany salyndy. Óńirde zamanaýı týrıstik ınfraqurylymdy qalyptastyrýǵa, tabıǵat jáne mádenıet qazynasyn saqtaýǵa ári damytýǵa baǵyttalǵan álemdik deńgeıdegi «Jańa Іle» týrıstik ortalyǵyn qurý jónindegi serpindi joba iske asyrylýda.

Nursultan Nazarbaev Qazaqstan Táýelsizdiginiń 20 jylynda Pavlodar oblysy qol jetkizgen nátıjelerdiń qorytyndysyna arnalǵan ekspozıtsııamen tanysty. Oblys ákimi B. Saǵyntaev Memleket basshysyna óńirdegi áleýmettik jáne ekonomıkalyq jetisikter týraly baıandady. Pavlodar oblysy ekonomıka jáne áleýmettik damýdyń barlyq kórsetkishteri boıynsha turaqty oń serpindi kórsetip keledi. Jalpy óńirlik ónimniń óndiriligen kólemi 2010 jyly 1031,9 mlrd. teńgeni qurady, 1993 jylmen salystyrǵanda, 430 ese ulǵaıdy. Jalpy óńirlik ónim mólsheri turǵyndardyń jan basyna shaqqanda 18 esege ósip, 1993 jylǵy 531,9 dollardan 2010 jyly 9387,1 dollarǵa ulǵaıdy. 1993 jyldan bastap óndirilgen ónerkásip óniminiń kólemi 256 ese ósti jáne 2010 jyly 844 mlrd. teńgeni qurady. Elimizdiń Údemeli ındýstrııalyq-ınnovatsııalyq damý baǵdarlamasy óńirdiń ekonomıkalyq damýyna úlken serpin berdi. Baǵdarlama aıasynda 168 ınvestıtsııalyq joba iske asyrylýda, búgingi kúni 42 óndiris iske qosyldy. 2016 jylǵa deıin taǵy 126 jobany iske qosý josparlanýda. Bul oblys ekonomıkasyna bir trıllıonnan astam teńgeni tartýǵa jáne 10300 jańa jumys ornyn ashýǵa múmkindik beredi. 1993 jyldan bastap aýyl sharýashylyǵynyń jalpy ónim kólemi 73 ese ósti, 2010 jyldyń sońyna qaraı 60,7 mlrd. teńgege jetti. Agroónerkásip kesheninde mal sharýashylyǵy salasynda, aýyl sharýashylyǵy ónimderin qaıta óńdeý jáne saqtaýǵa baǵyttalǵan 35 ınvestıtsııalyq joba iske asty. 2005-2011 jyldar aralyǵynda jańadan 20 densaýlyq saqtaý nysany paıdalanýǵa berildi, onyń ishinde aýyldyq jerlerdegi nysan sany - 11. Oblysta 30 mektep salynyp, 15,5 myń úırenýshilik oryndar paıdalanýǵa berildi. 2008 jyly qyrkúıekte Pavlodarda jańa Dostyq úıi ashylyp, onda 19 etnomádenı birlestik, sondaı-aq ulttyq jańarý mektebi ornalasty.

Prezıdent el Táýelsizdiginiń 20 jylynda Batys Qazaqstan oblysy qol jetkizgen nátıjelerdiń qorytyndysyna arnalǵan kórmemen tanysty. Oblys ákimi B. Іzmuhambetov Memleket basshysyna óńirdiń ekonomıkalyq, áleýmettik jáne gýmanıtarlyq damý serpini týraly baıandady. Oblysta óndirilgen jalpy óńirlik ónim kólemi sońǵy 15 jylda 25 mlrd. teńgeden 1048,8 mlrd. teńgege deıin ósti, halyqtyń jan basyna shaqqandaǵy esebi 38,5 myń teńgeden 1730,4 myń teńgege deıin ulǵaıdy. Oblystaǵy kásiporyndardyń bazalyq óndirisi kóleminiń udaıy artýy, jańa óndiristiń damýy, qýatty jańa óndiris kólemin endirý esebinen ónerkásip ónimi 990,1 mlrd. teńgege deıin ósti (1995 jyly - 12,3 mlrd. teńge boldy). Óńdeýshi saladaǵy ónimderdiń básekege qabiletin arttyrý maqsatynda kásiporyn bazasynda ınvestıtsııalyq jobalardy iske asyrý jóninde jumystar júrgizilýde. Osy rette eksportqa baǵyttalǵan salany damytý negizgi baǵyt retinde qaralap otyr. Búginde Indýstrııalandyrý kartasy aıasynda jalpy somasy 96,4 mlrd. teńgeni quraıtyn 20 ınvestıtsııalyq joba iske asyrylýda. Kórsetilgen jobany iske asyrý barysynda 900 turaqty jumys ornyn ashý qarastyrylǵan. Jyl saıyn 2 myń jańa shaǵyn kásipkerlik sýbektileri tirkeledi. Óńirdiń ekonomıkalyq belsendi turǵyndarynyń besinshi bóligi shaǵyn bıznes salasymen aınalysady. 2001 - 2010 jyldar aralyǵynda bilimge jumsalǵan shyǵys 6 ese, densaýlyq saqtaý salasyna - 8,5 ese artty. Sońǵy 10 jylda 35 bilim nysany, 71 densaýlyq saqtaý nysany salyndy, 8 bilim nysany, 6 densaýlyq saqtaý nysany qaıta jóndeýden ótkizildi.

Tanystyrylym aıaqtalǵannan keıin Memleket basshysy Nursultan Nazarbaev Beıbitshilik jáne kelisim saraıynda ótken Almaty, Pavlodar jáne Batys Qazaqstan mádenıet kúnderiniń gala-kontsertin tamashalady.