Memleket basshysy N. Nazarbaevtyń Indonezııaǵa resmı sapary josparlanýda

Bul týraly búgin elordada Indonezııa - Qazaqstan Іskerlik keńesiniń saltanatty ashylýy barysynda málim boldy.  

«Aldaǵy sáýir aıynda Qazaqstan Prezıdenti N. Nazarbaev resmı saparmen Indonezııaǵa barýy josparlanady. Sondyqtan da, Indonezııa-Qazaqstan Іskerlik keńesiniń ashylýy eki eldiń qarym qatynasyn keńeıtýge múmkindik bere otyryp, taraptardyń ekijaqty baılanysyn nyǵaıta túsedi», - dedi Indonezııa-Qazaqstan Іskerlik keńesiniń qurmetti tóraǵasy Irvan Idıng.

Al óz kezeginde Indonezııa Syrtqy ister mınıstriniń orynbasary, mınıstrdiń Ekonomıkalyq-áleýmettik jáne mádenı máseleler jónindegi keńesshisi Sýprapto Martosetomo da sóz arasynda ekijaqty yntymaqtastyqtyń jańa deńgeıge kóteriletin jaǵdaılardyń oryn alyp otyrǵanyn atap ótti. «Bizdiń elderdiń ózara baılanysy joǵary deńgeılerde de nyǵaıyp otyr. Máselen, byltyrǵy jyly Indonezııanyń joǵary deńgeıdegi delegatsııa quramy Qazaqstanǵa kelip, osy eldiń basshylarymen kezdesti. Endi aldaǵy sáýir aıynda  Qazaqstan Prezıdenti N. Nazarbaevtyń Indonezııaǵa resmı saparmen baratyny kútilip otyr. Bul sapardyń mán-mańyzy zor. Óıtkeni Prezıdent sapary Qazaqstan men Indonezııanyń tek saıası ǵana emes, ekonomıkalyq yntymaqtastyq ornatýdyń jańa paraǵyn ashatyn bolady», - dedi Sýprapto Martosetomo.