Memleket basshysy N.Nazarbaev Tuńǵysh Prezıdent, Elbasy týraly zańnamaǵa ózgerister men tolyqtyrýlar engizý týraly QR Parlamenti qabyldaǵan zańdarǵa qol qoıýdan bas tartty - respýblıkalyq basylymdarǵa sholý

***

«Egemen Qazaqstan» gazetiniń búgingi nómirinde QR Prezıdenti Nursultan Nazarbaevtyń Qazaqstan Respýblıkasynyń azamattaryna, Qazaqstan Respýblıkasynyń Parlamentine jáne «Nur Otan» halyqtyq-demokratııalyq partııasynyń Saıası bıýrosyna qarata aıtylǵan úndeýi jarııalandy. Onda Elbasy aldyna Tuńǵysh Prezıdent, El Basy týraly zańnamaǵa ózgerister men tolyqtyrýlar engizý týraly QR Parlamenti qabyldaǵan zańdar kelip túskendigin, bul oraıda depýtattarǵa, osy mártebeni qabyldaýǵa tilek bildirip, hat joldaǵan otandastaryna rızashylyǵyn bildirgen.

«Táýelsizdik jyldary biz sizdermen birge órkenıetti álemniń ólshemi men dástúrlerine sáıkes erkin, zaıyrly, memleket qurýdamyz. Biz osy jolda qol jetkizgen tabystarymyz arqyly jetekshi halyqaralyq uıymdar men ıntegratsııalyq qurylymdardyń zor qurmetine ıe boldyq. Barshańyz bilesizder, Qazaqstan Eýropadaǵy Qaýipsizdik jáne yntymaqtastyq uıymynyń is basyndaǵy Tóraǵasy bolyp tabylady, óńirlik birqatar uıymdarǵa basshylyq jasaýda. Biz osy senimniń údesinen shyǵyp, abyroıly mindetti laıyqty atqarýǵa tıispiz. Joǵaryda aıtylǵan jaǵdaılarǵa baılanysty, qurmetti Senat jáne Májilis depýtattary, maǵan jiberilgen zańdarǵa qol qoıýdan bas tartý jónindegi ustanymymdy durys túsinýlerińizdi ótinemin», delingen Prezıdent málimdemesinde.

«Investorlar el ıgiligine qyzmet etýge tıis». «Egemen Qazaqstan» gazetinde osy taqyryppen jaryq kórgen maqala Almatyda ótken IV Qazaqstandyq ınvestıtsııalyq sammıtke arnalǵan. Alqaly jıynǵa qatysqan Elbasy ındýstrııalyq-ınnovatsııalyq damý baǵdarlamasy aıasynda eldi ındýstrııalandyrý kartasy daıyndalǵanyn, oǵan jalpy quny 45 mıllıardtan astam dollar bolatyn respýblıkalyq jáne aımaqtyq máni bar 100 joba engizilgenin atap ótken. Keleli keńes barysy jaıynda basylymnyń juma kúngi nómirinen egjeı-tegjeıli oqı alasyzdar.

«Keshe Aqordada Qazaqstan Respýblıkasy Prezıdentiniń kómekshisi - Qaýipsizdik keńesiniń hatshysy Marat Tájınniń tóraǵalyǵymen Qazaqstan Respýblıkasy Qaýipsizdik keńesiniń janyndaǵy Sarapshylar keńesiniń otyrysy ótti», dep jazady «Egemen Qazaqstan» gazeti. Basylymnyń atap ótýinshe, jıynnyń kún tártibinde aqparattyq qaýipsizdik, kólik qaýipsizdiginiń jaı-kúıi, ony qamtamasyz etý sharalary jáne Qazaqstannyń tranzıttik áleýetine tónetin qaterler týraly máseleler qarastyrylǵan.

«Alash aınasy» gazeti juma kúngi nómirinde «Endi qus qyrylyp jatyr» dep dabyl qaqty. Basylymnyń jazýynsha, Almaty oblysyna qarasty Qarasaı aýdanynda qustardyń jappaı qyrylýy tirkelgen. Oblystyq tótenshe jaǵdaılar jónindegi departamenti bergen málimetke qaraǵanda, Almaty oblysy, Qarasaı aýdany Shamalǵan stansysyna jaqyn jerdegi saıajaılardyń birinde qaratorǵaılar qyrylǵan. Arnaıy qurylǵan veterınarlyq komıssııa oqıǵa ornyna baryp, ólgen 20 qusty saraptamaǵa alǵan. Ázirshe, qustardyń qyrylýyna sebep bolǵan jaǵdaıdyń ne ekeni belgisiz.

Osy basylymnyń 4-shi betinde «Memlekettik sheneýnikter memlekettik baǵdarlamaǵa nege qyryn qaraıdy?» degen taqyryppen berilgen maqalada avtor memlekettik baǵdarlama boıynsha berilgen páterlerdiń sapasyzdyǵyna nazar aýdartady. Sońǵy kezderi Memlekettik turǵyn úı baǵdarlamasyna jaýapty mekemeler tarapynan tıisti baqylaý men memlekettik baǵdarlamaǵa degen oń kózqarastyń bolmaýynan atalmysh baǵdarlama aıasynda paıdalanýǵa beriletin turǵyn úıler tóńireginde daý-damaı kóbeıip ketti. Buǵan dálel memlekettik baǵdarlama boıynsha Túrksib aýdanynda salynǵan Spasskaıa kóshesi №66 «V», 66 «G» úıleriniń jertóleleri sýǵa tolyp, masa, shybyn-shirkeı úıelep, egeýquıryqtar órip ketken. Jańa úıler óne boıy syz bolǵandyqtan turǵyndar ózi úıinen basqa jaqqa bezip, qala ortasynan páter jaldap panalaýǵa májbúr. Turǵyndardyń balalary syzdan aýrýhanada aılap jatqan. «Kókjıek» yqshamaýdanynda da osyndaı keleńsiz kórinis. Bul týraly tolyǵyraq «Alash aınasy» gazetiniń búgingi sanynan oqı alasyzdar.

«2002-2010 jyldarǵa arnalǵan «Aýyzsý» memlekettik baǵdarlamasy aıasyndaǵy jumystar tolyǵymen oryndalmaǵan. Sondyqtan bul baǵyttaǵy isti aıaǵyna deıin jetkizý úshin atalmysh baǵdarlama merzimi 2015 jylǵa deıin uzartylmaqshy. Bul týraly keshe Almatyda Ulttyq ınjenerlik akademııasynda ótken «Aýyzsý» dóńgelek ústeli barysynda Aýyl sharýashylyǵy mınıstrligi Sý qorlary komıtetiniń tóraǵasy Anarbek Orman málimdedi», dep jazady «Alash aınasy» gazeti. Basylym basylymǵa tuzdyq retinde QR Ulttyq ınjenerlik akademııasy eEkologııa bóliminiń tóraǵasy Meńlibaı Myrzahmetovtiń pikirin qosa bergen. Onyń aıtýynsha, Syrdarııa ózeninde 1 lıtr sýdaǵy mıneraldaný 2 paıyzdy quraıdy, al norma boıynsha bul kórsetkish 1 lıtrge 1 paıyz bolýy tıis. Ertis ózenindegi aýyr metaldar normada kórsetilgen shekten 12-15 ese kóp eken. «Baǵdarlama bar, biraq aýyz sýǵa jarymaımyz» degen taqyryppen berilgen maqalany egjeı-tegjeıli oqyǵyńyz kelse, basylymnyń búgingi nómirine nazar salyńyz.

***

Elbasy Nursultan Nazarbaev keshe Almatydaǵy rezıdentsııasynda Týrızm jáne sport mınıstri, Astana, Almaty qalalary jáne Almaty oblysy ákimderimen 2011 jylǵy qysqy Azııa oıyndaryna oraı keńes ótkizdi. Osyǵan oraı «Aıqyn» gazetinde «Prezıdent Azıada oıyndaryna daıyndyqty saralady» degen taqyryppen maqala basyldy. Basylymnyń baıandaýynsha, Memleket basshysy atqarylyp jatqan is-sharalarmen tanysa kelip, «Azıada oıyndaryn elimizde ótkizý - álemdik sport qozǵalysyndaǵy Qazaqstannyń halyqaralyq bedeliniń kórsetkishi», dep atap ótken.

«Elbasynyń Almatydaǵy rezıdentsııasynda Memlekettik hatshy - Syrtqy ister mınıstri Qanat Saýdabaevtyń tóraǵalyǵymen ádebıet jáne óner salasyndaǵy 2010 jylǵa arnalǵan memlekettik syılyqtar berý jónindegi komıssııanyń alǵashqy otyrysy ótti», dep jazady «Aıqyn» gazeti. Basylymnyń atap ótýinshe, aǵymdaǵy jyly ádebıet pen óner salasy boıynsha 17 shyǵarma, mýzyka, teatr jáne kıno salasy boıynsha 10 týyndy, beıneleý men sáýlet óneri salasy boıynsha 8 shyǵarma memlekettik syılyqqa usynylyp otyr. Jalpy 35 úmitker bar. alaıda beriletin syılyq - 3-eý ǵana. Memlekettik syılyqqa kimder usynylǵanyn bilgińiz kelse, basylymnyń búgingi sanyndaǵy «Memlekettik syılyq ádebıet pen óner salasynda úsh-aq adamǵa beriledi» degen maqalaǵa nazar aýdaryńyz.

Qazaqstandyq balýandar úshin jaz aılary jaýapty jarystarǵa toly bolmaq. Grek-rım men erkin kúres sheberleri birqatar týrnırlerde baq synasa, áıelder kúresi boıynsha da birneshe dúbirli dodalardyń baıraǵy jelbireıdi. Osy jáne basqa da sport taqyrybyna qatysty maqalalar toptamasyn oqyǵyńyz kelse, «Aıqyn» gazetiniń búgingi nómirine nazar salyńyz.

«Kazahstanskaıa pravda» gazetiniń jazýynsha, keshe QR Prezıdenti Nursultan Nazarbaev Almatydaǵy rezıdentsııasynda Eýrazııalyq damý jáne qaıta qurý bankiniń prezıdenti Tomas Mırovpen kezdesti. Júzdesý barysynda eki jaqty ekonomıkalyq qarym-qatynas máselesi talqylanǵan. Basylym Tomas Mırovtiń «men búgingi tabysty kezdesý úshin Nursultan Ábishulyna alǵys bildiremin. Jalpy alǵanda, bul Qazaqstannyń damýy men Eýrazııalyq damý jáne qaıta qurý bankiniń arasyndaǵy baılanys týraly erkin pikir almasý boldy», degen sózin keltirgen.