Memleket basshysy Muzafar Álimbaevtyń jaqyndaryna kóńil aıtty

ASTANA. QazAqparat - Qazaqstan Prezıdenti Nursultan Nazarbaev Muzafar Álimbaevtyń qaıtys bolýyna oraı onyń týǵan-týysqandary men jaqyndaryna kóńil aıtý jedelhatyn joldady, dep habarlaıdy QazAqparat.

Memleket basshysy kórnekti aqyn, Uly Otan soǵysynyń ardageri Muzafar Álimbaevtyń dúnıeden ótkeni týraly habardy zor kúızelispen qabyldady.

Jedelhatta Muzafar Álimbaevtyń qazaq ádebıetin damytýǵa jáne Qazaqstannyń óskeleń urpaǵyn tárbıeleýge baǵa jetpes úles qosqany atap ótilgen.

«Keńestik kezeńde ol qazaq ádebıetiniń alyptarymen qanattasa júrip, Otan ıgiligi jolynda jemisti eńbek etti. Kóptegen jyr jınaqtary men án mátinderiniń avtory atandy. Otyz jylǵa jýyq balalardyń súıikti «Baldyrǵan» jýrnalynyń redaktory bolyp, ana tilimizdiń damýyna jáne búldirshinderimizdiń durys tálim-tárbıe alýyna laıyqty úles qosty. Qalyń jurtshylyq úshin onyń halqymyzdyń maqal-mátelderin jınaqtap, zertteýdegi eńbeginiń mańyzy zor. Ol jurt árdaıym aıtyp júretin kóptegen qanatty sózder men sóz tirkesterin ómirge ákeldi.

Muzafar Álimbaevtyń esimi men eńbegin halqymyz árdaıym jadynda saqtaıdy dep senemin», - delingen jedelhatta.