Memleket basshysy: Meniń EAEO-ǵa degen kózqarasym ózgergen joq
ASTANA. QazAqparat - Qazaqstan Prezıdenti Nursultan Nazarbaev otandyq telearnalarǵa bergen suhbatynda belgili bir qıyndyqtarǵa qaramastan, Eýrazııalyq ekonomıkalyq odaqtyń bolashaǵyna úlken úmitpen qaraıtynyn aıtty, dep habarlaıdy QazAqparat.
QR Prezıdentiniń aıtýynsha, kórshiles memleketterde túrli suraqtardyń týyndaýy zańdy. Degenmen ony birlesip sheshý qajet.
«Qazir daǵdarys, saýda kólemi tómendedi. Osynyń barlyǵy suraqtar týdyrady, «osy bizge kerek pe edi?» degen. Odaq kerek, sebebi qazir bizdiń memleketter arasynda kedendik shekara joq. Adamdar, taýarlar, qarajat erkin almasa beredi. Qazaqstandyqtar Reseıde kásiporyn asha alady, reseılikter Qazaqstanda, Belarýsta, Qyrǵyzstanda, taǵy sol sııaqty», - dedi Elbasy.
Nursultan Nazarbaevtyń sózinshe, erkin qozǵalys - bul úlken ıgilik. Bul - memleketterdiń damýy, ekonomıkalardyń órkendeýi.
«Men aýqymdy ári tereń qaraýǵa tyrysamyn. Barlyq qıyndyqtar, qazir bizde bar, ónerkásiptik daǵdarys, taýar baǵalarynyń qymbattaýy, bulardyń barlyǵy bir kúni ótedi, saıabyrsıdy, ornyna keledi. Sol kezde biz ary qaraı keńeıe beremiz. Eger Eýrazııalyq ekonomıkalyq odaq jaqsy jumys istep ketse, Eýropalyq odaq ta bizben áriptestik ornatýǵa qyzyǵýshylyq tanytatynyna senimdimin», - dedi ol.
Prezıdenttiń málimetteri boıynsha, 40-qa tarta memleket EAEO-tyń baqylaýshysy bolǵysy keledi.
«Nege? Sebebi bul - 180 mıllıondyq naryq. Mundaı naryq barlyǵyna qajet. Eýropalyq odaqta da qıyndyqtar bar. Qaıshylyqtar bolmasa, Anglııa odan shyqpas edi. Eýrazııalyq ekonomıkalyq odaqtyń jalpy baǵyty durys, biraq toqtap qalmaı, onyń negizin nyǵaıtýdy jalǵastyra berýimiz kerek», - dep túıdi oıyn Memleket basshysy.
