Memleket basshysy mańǵystaýlyq stýdenttermen kezdesti

Sh. Esenov atyndaǵy ýnıversıtetke at basyn buryp, teńiz akademııasynyń materıaldyq bazasymen tanysty, dep habarlaıdy QazAqparat tilshisi.

Prezıdent óńirdegi jalǵyz joǵary oqý ornynyń ǵımaratyna soǵyp, ǵylymı jetistikterimen tanysty.

«Ýnıversıtettiń mıssııasy men maqsatyn tanystyrdyq. Esenov ýnıversıtetiniń brendi aıasynda tolyq aqparat berildi. «Esenov til ortalyǵy» baǵdarlamasy aıasynda biz ózindik sertıfıkatsııalaýdy bastadyq. Bizdiń oqytýshymyz AQSh-qa baryp, sheteldik professorlardy alyp keldi. Olar muǵalimderge sabaq berip, táýelsiz sertıfıkatsııadan ótkizedi», - dedi Sh. Esenov atyndaǵy KMTIÝ rektory Berik Ahmetov.

Aıta keteıik, Teńiz akademııasy - Qazaqstandaǵy materıaldyq bazasy tolyqqandy qamtylǵan jalǵyz bilim ordasy. Halyqaralyq teńiz standartyna saı jasaqtalǵan. Jyl saıyn 35 stýdent bilim alyp shyǵady. Qazir túlekterge álemniń túrli halyqaralyq porttary men mekemelerinen suranys bar.

«131 stýdent bilim alýda. 116-sy grantpen oqyp jatyr. Bilim berý 4 baǵytta júzege asyrylady: «Keme júrgizý», «Kemeniń energetıkalyq qondyrǵylaryn paıdalaný», «Kemedegi elektr jabdyqtaryn jáne avtomattandyrylgan jabdyqtaryn paıdalaný» jáne «Porttardyń jáne kólik termınaldarynyń tıep-túsirý jabdyqtaryn paıdalaný»,-deıdi Teńiz akademııasynyń dırektory Bolat Sársenbaev.

Stýdentter kezdesýde usynys-tilekterin jetkizip, prezıdentpen emin-erkin pikir almasty. Qazir ýnıversıtette AQSh-tan kelgen oqytýshylar aǵylshyn tili kýrstaryn ótkizýde. Bul - jahandyq deńgeıge bet burǵan bilim ordasynyń úlken jetistigi. Memleket basshysy da osyny ańǵaryp, oqytýshylarmen de tildesti.