Memleket basshysy Mańǵystaý óńiriniń tynys-tirshiligimen tanysty

Memleket basshysy sapar barysynda ártúrli jergilikti kásiporyn ujymdarymen kezdesip, jumysshylardyń pikirin tyńdady. «Aqtaý teńiz soltústik termınaly» JShS bas dırektory A.Qarabasov eńbek naryǵyndaǵy turaqsyzdyqty joıý jáne aımaq turǵyndaryn jumysqa orna­lastyrýǵa qoldaý kórsetý maqsa­tyndaǵy sharalar týraly aıtyp ótti. Osy rette Mańǵystaý oblysy ákimdigimen jasalǵan «Jańa serpin» óńirlik baǵdarlamasy aıasynda termınal úshin 27 adam oqytylǵan. Kásiporyn 190 turǵyndy jumysqa or­nalastyrǵan.

Aqtaý teńiz soltústik termınaly jobasynyń quny 37,5 mlrd teńgeni quraıdy. Kópbeıindi termınaldyń óndiristik qýaty jylyna 3 mln tonnaǵa deıin negizgi júkti, onyń ishinde 1,5 mln tonnaǵa deıin dándi daqyldy aýystyryp tıeýge múmkindik beredi. Termınal jumysy eksport-ımport ósimin arttyrýǵa jáne Qazaqstan men Ortalyq Azııa elderi ónimderin Aqtaý porty arqyly Kavkaz mańy, Parsy shyǵanaǵy elderine jáne Reseı Federatsııasyna jetkizýge baǵyttalǵan. Kásiporynda jyl boıy astyq, metall, iri tonnalyq júk konteınerlerin qabyldap alý, saqtaý jáne jóneltý jumystary júrgiziledi, vagondarǵa júkter tıelip, túsiriledi, kemelerge keshendi qyzmet kórsetiledi.
Memleket basshysy Mańǵystaý oblysyna jumys sapary aıasynda óńirdiń jurtshylyq ókil­de­rimen kezdesti.

Elbasy áńgime barysynda Qazaqstannyń ja­han­dyq básekege qabilettiligin damytýdy kóz­deı­tin mindetterdiń aýqymdy ekendigin aıta kelip, táýelsizdik jyldarynda Mańǵystaýdyń el óner­kásibindegi úlesiniń artqanyna toqtaldy.

- Ótken jyldarda Mańǵystaý oblysynyń ekonomıkasy aıtarlyqtaı ósti. Táýelsizdik alǵan kezden bastap óńirlik jalpy ónim 32 ese kóbeıip, 2 trıllıon teńgeden asty. 7 mıllıon sharshy metr turǵyn úı salyndy. 2016 jyly óńirge tartylǵan ınvestıtsııa 400 mıllıard teńge boldy. Bul - 2000 jylmen salystyrǵanda 12 ese artyq, - dedi Nursultan Nazarbaev.

Memleket basshysy Mańǵystaý oblysynyń ener­getıkalyq, ónerkásiptik jáne kólik-logıs­tı­ka­lyq áleýeti eleýli ekenin aıtty.

- Eýrazııanyń dál ortasynda ornalasqan Qazaqstan árdaıym qurlyqtaǵy el bolyp sanalyp keldi. Búgingi tańda biz qurlyq aýqymymen shek­telip qalmaı, tomaǵa-tuıyqtyq sheńberin buzdyq.

Aqtaýda zamanaýı teńiz portyn saldyq, beınelep aıtqanda, «jolsyz jerden jol ashtyq», - dedi Elbasy.

Memleket basshysy júıeli damýdyń jarqyn mysaly retinde «Aqtaý teńiz porty» arnaıy eko­nomıkalyq aımaǵyn atap ótti.
Nursultan Nazarbaev shekara mańyndaǵy yn­ty­maqtastyqtyń mańyzdy áleýetin paıdalaný qa­jettigine toqtaldy.

- Qazaqstan árdaıym kórshiles eldermen dos­tyq qarym-qatynas ornatyp keledi. Keshe ǵana men Ázerbaıjanda boldym. Bul elmen yn­tymaqtastyqty keńeıtý úshin múmkindikterimiz mol. Sońǵy eki jyldyń ózinde Mańǵystaý oblysy men Ázerbaıjan arasyndaǵy ózara taýar aınalymy bes ese ósken. Aımaqtaryńyz Qazaqstandy jahandyq jáne óńirlik naryqtarmen baılanystyratyn asa mańyzdy tranzıt toraby bolyp sanalady. Bul orasan zor áleýetti tolyq paıdalana bilgen jón, - dedi Memleket basshysy.

Elbasy sonymen birge óńirdiń áleýmettik sa­la­daǵy jetistikterin atap ótti.

- Táýelsizdik jyldary oblys turǵyndarynyń sany eki ese ósip, 640 myń adam boldy. Halyqtyń ómir jasy da uzaryp keledi. Osy jyldar ishinde 271 myń bala dúnıege keldi. Bul respýblıka boıynsha eń joǵary kórsetkish bolyp tabylady. Tarıhı Otanyna 125 myńnan astam adam oraldy. Bul - tutas bir qala. Shırek ǵasyrda medıtsına mekemeleriniń sany eki jarym ese, al mektepter eki ese artqan. 229 balabaqsha paıdalanýǵa berildi, - dedi Nursultan Nazarbaev.

Mańǵystaý oblysynyń ákimi E.Toǵjanov ob­lystaǵy áleýmettik-ekonomıkalyq jaǵdaı men ony damytý perspektıvalary týraly baıandady. Kezdesý barysynda sóz alǵan jurtshylyq ókilde­ri óńirdiń áleýmettik-ekonomıkalyq damýynyń ózek­­ti máselelerine udaıy kóńil aýdaryp, tıimdi memlekettik saıasat júrgizip otyrǵany úshin Memleket basshysyna óz rızashylyqtaryn bildirdi.

Sońynda Memleket basshysy jıynǵa qaty­­sý­shylardyń nazaryn elimizdiń tabys­ty da­mýynyń kepili bolyp sanalatyn birlik, tatýlyq pen dos­tyqty saqtaý qajettigine aýdaryp, mańǵys­taý­lyq­tarǵa zor densaýlyq jáne baq-bereke tiledi.