Memleket basshysy «Makdonalds» korporatsııasynyń Qazaqstandaǵy alǵashqy kásiporny jumysymen tanysty
ASTANA. QazAqparat - Memleket basshysy Nursultan Nazarbaev «Makdonalds» korporatsııasynyń Qazaqstandaǵy alǵashqy kásiporny jumysymen tanysyp, eńbek ujymymen áńgimelesti, dep habarlaıdy Aqordanyń baspasóz qyzmeti.
Meıramhana aýdany 863 sharshy metr aýmaqty alyp jatyr, kelýshiler úshin otyrýǵa laıyqtalǵan 206 oryn bar. Ony bezendirýge jańa tujyrymdarǵa negizdelgen dızaındar, sondaı-aq kelýshilerge qyzmet kórsetýdegi eń zamanaýı júıeler qoldanylǵan.
Kompanııanyń ekinshi meıramhanasyn da 2016 jyly ashý josparlanǵan, al taıaý bes jylda taǵy 15 meıramhana ashý kózdelip otyr.
«Makdonaldstyń» Qazaqstandaǵy meıramhanalaryna azyq-túlik synnan ótken ónim jetkizýshilerden keletin bolady. Sonymen birge jergilikti óndirýshiler bazasyn damytý jumystary jalǵasýda.
Meıramhananyń Astanadaǵy resmı ashylý rásimi 8 naýryzda ótedi.
Aıta keteıik, «Makdonalds» - qoǵamdyq tamaqtaný jáne jyldam qyzmet kórsetý salasyndaǵy álemdik kóshbasshynyń biri. Álemniń 120 elinde kompanııanyń 36 myń kásiporny kelýshilerge qyzmet kórsetedi.
