Memleket basshysy «LÝKOIL» munaı kompanııasynyń prezıdentin qabyldady
Qasym-Jomart Toqaevqa munaı kompanııasynyń 2019 jyly Qazaqstanda atqarǵan jumystarynyń esebi berildi. Sondaı-aq Vagıt Alekperov «Jeńis» jáne «I-P-2» teńiz jobalaryn júzege asyrýdyń qazirgi ahýaly men perspektıvalary týraly baıandady.
Reseı bıznesmeni Qazaqstan Prezıdentine Almaty oblysynda bıyl qyrkúıek aıynda ashylǵan «LÝKOIL» jaǵarmaı ónimderin shyǵaratyn zaýyt jumysynyń alǵashqy nátıjeleri jaıynda málimet berdi.
Memleket basshysy osyndaı zaýyt salǵany úshin Vagıt Alekperovke rızashylyǵyn bildirdi.
– Bul – sizdiń kompanııanyń Qazaqstan ekonomıkasyna qosqan eleýli úlesi. Mundaı baǵyttaǵy ınvestıtsııalarǵa jan-jaqty qoldaý kórsetemiz, – dedi Qasym-Jomart Toqaev.
Vagıt Alekperov atalǵan óndiris nysany kompanııanyń maqtanyshyna aınalǵanyn atap ótti. Onyń aıtýynsha, kásiporyn 700-ge jýyq ónim túrin shyǵarady jáne bir jarym aıdyń ishinde óziniń jobalyq qýatyna tolyq jetedi.
