Memleket basshysy Lısakovkadaǵy demalys ortalyǵyna bardy
Munda balalarǵa arnalǵan batýt ortalyǵy, tuz shahtasy, sondaı-aq ártúrli oıyn-saýyq, demalys oryndary qarastyrylǵan. Ortalyq dırektory Lıýbov Zaharova uzaq jyldar boıy bilim salasynda eńbek etip kele jatqanyn jáne óziniń jeke kásibin 2014 jyly 180 balaǵa arnalǵan jekemenshik «Balaqaı» balabaqshasyn ashýdan bastaǵanyn aıtty. Qazir «Alaqaı» ortalyǵy janynan akvapark qurylysy júrip jatqanyn, keleshekte órmeleý alańy, jazǵy lager sekildi jobalardy júzege asyrǵysy keletinin jetkizdi.
Memleket basshysy kásipkerdiń oıyn quptaıtynyn aıtyp, kásibine tabys tiledi.
«Siz óte durys kásippen aınalysyp jatyrsyz dep oılaımyn. Lısakov qalasynyń, jalpy alǵanda, jaǵdaıy jaqsy. Bul oraıda burynǵy qala basshylarynyń da, siz sııaqty qala turǵyndarynyń da sińirgen eńbegi zor. Árıne, bul – óte tabysty kásip bolmaǵanymen, halyqtyń qajettiligine baǵdarlanǵan bıznes. Sondyqtan qala jáne oblys basshylyǵy sizge qoldaý kórsetedi dep úmittenemin», – dedi Prezıdent.
Qasym-Jomart Toqaev uzaq jyldar boıy bilim berý júıesinde adal eńbek etip, óskeleń urpaqtyń tárbıesine eleýli úles qosqany úshin Lıýbov Zaharovany Qazaqstan Respýblıkasy Prezıdentiniń Alǵys hatymen jáne «Altyn barys» tósbelgisimen marapattady.
Prezıdentke Qostanaı oblysynyń ákimi Qumar Aqsaqalov taıaý jyldary Qostanaı qalasynda Ústel tennısi ortalyǵy, al segiz aýylda dene shynyqtyrý-saýyqtyrý ortalyǵyn salý josparlanyp otyrǵanyn baıandady.
Sonymen qatar Qasym-Jomart Toqaev ortalyqta Qostanaı oblysynyń belsendi jastarymen áńgimelesti.
Lısakov qalasyndaǵy №4 mekteptiń 11-synyp oqýshysy, júzýden Qazaqstannyń sport sheberi Dmıtrıı Enes Prezıdentke jetistikteri men armany týraly aıtty.
«Bala kezimnen sportpen aınalysyp, jaqsy nátıjelerge jettim. Qazaqstan chempıonatynda jeńiske jettim. Ulttyq quramynyń sapyna alyndym. Frantsııada ótken 19-shy Dúnıejúzilik gımnazıadada chempıon atandym. Al byltyr jeltoqsan aıynda Grekııanyń Salonıkı qalasyndaǵy halyqaralyq týrnırde kúmis medal ıelendim. Keleshekte álemdik dodalardyń jeńis tuǵyrynda Qazaqstan týyn maqtanyshpen kótergim keledi», – dedi Dmıtrıı Enes.
«Sanaly urpaq-2050» qoǵamdyq birlestiginiń tóraǵasy Nurbek Ábdibekov azamattyq qoǵamnyń damýyna aıryqsha kóńil bólgeni úshin Prezıdentke alǵys aıtty. Sondaı-aq úkimettik emes uıymdar ózekti máseleler kóterip, sheshim qabyldaý protsesine belsendi aralasa bastaǵanyn málimdedi.
«Servise trade Company» JShS dırektory Sergeı Starkov bızneske memlekettik qoldaý kórsetý baǵdarlamasy aıasynda eki túrli kásip ashyp, birneshe adamdy jumyspen qamtyǵanyn atap ótti. Ol taıaýda iske qosylǵan jyldyq mólsherlemesi 2,5 paıyz mıkrokredıtteý baǵdarlamasy jastar úshin aıtarlyqtaı qoldaý ekenin, eger nıet bolsa, shaǵyn eldi mekenderde de sharýany dóńgeletip, iri jobalar jasaýǵa bolatynyn aıtty.
«Shyn máninde, ózińniń qarym-qabiletińdi kórsetip, halyqtyń ıgiligine jumys istep, el damýyna úles qosý úshin úlken qalada turý shart emes. Lısakov basqa monoqalalarmen salystyrǵanda áldeqaıda taza, jınaqy ekenin álginde aıttym. Kásippen, paıdaly ispen aınalysý arqyly buǵan sizder de zor úles qosyp júrsizder. Osyndaı qalalardy damytýymyz kerek», – dedi Prezıdent.
Memleket basshysy elimizde osyndaı eńbekqor, uqypty, bilimdi jastardyń kóp bolǵanyn qalaıtynyn atap ótip, memleket jastar saıasaty men azamattyq qoǵamdy damytý máselesine aıryqsha kóńil bóletinin jetkizdi.
Aıta ketsek, Prezıdent Qasym-Jomart Toqaev Qostanaı oblysyna jumys saparymen júr, ol buǵan deıin Lısakov qalasynyń jylý elektr ortalyǵyna bardy.
