Memleket basshysy latyn qarpine kóshýdiń jeńil joldaryn kórsetip berdi
ASTANA. 29 jeltoqsan. QazAqparat - Eger latyn álipbıin engizýge aqylmen kele alsaq, onda balalarymyzǵa jeńil bolady, bizge jáne tutastaı elimizge jeńil bolady, elimizdiń álemdik ekonomıkalyq jáne ǵylymı keńistikke enýi jeńildeı túsedi.
Bul týraly Memleket basshysy Nursultan Nazarbaev qazaqstandyq BAQ-qa bergen suhbatynda málim etti.
«Budan qashyp qutyla almaımyz, bul - keleshektiń talaby. Sondyqtan biz osyǵan umtylýǵa tıispiz. Biraq bul maqsatqa biz úlken sarabdaldyqpen, baıyptylyqpen kelýimiz kerek. Kırıllıtsany qosarlana paıdalaný belgili bir ýaqytqa deıin jalǵasatyn bolady», - dedi Memleket basshysy.
«Mine, qarańyzdar, qazir barlyq balalar birinshi synyptan bastap úsh tildi: memlekettik, orys jáne aǵylshyn tilderin oqıdy. Demek protsess júrip jatyr, 15 jyldan keıin bári de bul alfavıtti biletin bolady. Jáne halyqtyń basym bóligi, ásirese, bul basqarýshy elıtaǵa qatysty, óıtkeni, olar sóıleýge mindetti, aǵylshyn tilin biletin bolady. Úkimet múshesi nemese ákim aǵylshynsha bilmeı tura almaıdy. Másele qazir osylaı qoıylýda. Óıtkeni, álemde únqatysý negizinen osy tilde júredi. Memleketaralyq taýar aınalymy ósip kele jatqanyn da eskergen jón, bizde eksport kólemi 74 mıllıard dollar, ımport - 36 mıllıard dollar. Biz álemniń 80 elimen baılanys jasap, saýda-sattyq júrgizemiz, saıası qarym-qatynas jasaıtyn memleketter qatary budan da kóp. Sondyqtan latyn álipbıine ótý tabıǵı túrde júredi dep sanaımyn», - dedi Prezıdent.
«Biz osyǵan beıimdelýimiz kerek. Bilimdi azamattarymyz, zııaly qaýym osy máseleni nasıhattap, úgitteýge tıis», - dedi Nursultan Nazarbaev.
