Memleket basshysy Lakshmı Mıttalmen kezdesý ótkizdi

NUR-SULTAN. QazAqparat - Beınebaılanys rejıminde ótken kezdesýde Qasym-Jomart Toqaev pen Lakshmı Mıttal «ArselorMıttal Temirtaý» kompanııasynyń jumysyna qatysty birqatar ózekti máseleni talqylady, dep habarlaıdy QazAqparat Aqordaǵa silteme jasap.

Prezıdentke kompanııanyń ınvestıtsııalyq baǵdarlamasy jáne óndiristi ulǵaıtý, ónimniń jańa túrlerin shyǵarý, sondaı-aq Qazaqstanmen aldaǵy ýaqyttaǵy seriktestik aıasynda áleýmettik mindettemelerdi oryndaý jónindegi jospary týraly málimet berildi. Sondaı-aq qural-jabdyqtardy jańartý, materıaldyq-tehnıkalyq bazany jaqsartý, kásiporyndardaǵy eńbekti qorǵaý máseleleri qarastyryldy.

Memleket basshysy qaýipsiz jumys ortasyn qamtamasyz etýdiń, halyqaralyq qaýipsizdik talaptaryn saqtaýdyń jáne qyzmetkerlerdi oqytýdyń asa mańyzdy ekenin atap ótti. Qasym-Jomart Toqaev qazaqstandyq jumysshylarǵa laıyqty eńbekaqy tólenýge tıis ekenin aıtty.

Sonymen qatar «ArselorMıttal Temirtaý» kompanııasynyń 2024 jylǵa qaraı qaldyqtardy 30 paıyzǵa, al 2030 jylǵa qaraı 50 paıyzǵa azaıtý, sondaı-aq osy strategııany iske asyrýǵa Qaraǵandy oblysynyń jurtshylyǵyn tartý úshin qabyldap jatqan sharalaryna erekshe nazar aýdaryldy.