Memleket basshysy Qyzylorda óńiriniń basshysynan qurylys qarqynynyń baıaýlaý sebebin surady
«Gúlshara Naýshaqyzy, halyqty baspanamen qamtamasyz etý – ózekti másele. Statıstıkaǵa qarasaq, byltyr Qyzylorda oblysynda qurylys qarqyny 27 paıyzǵa tómendegen. Turǵyn úılerdi paıdalanýǵa berý 20 paıyzǵa azaıǵan. Bul memleket boıynsha eń tómengi kórsetkish. Jaǵdaıdy túzeý úshin ne istep jatyrsyzdar? Bul másele boıynsha qandaı josparlaryńyz bar?» - dep surady Qasym-Jomart Toqaev Úkimettiń keńeıtilgen otyrysynda Qyzylorda oblysynyń ákiminen.
Bul suraqqa jaýap bergen Gúlshara Ábdihalyqova pandemııa men nesıelik úılerge suranystyń azaıýyna baılanysty qurylys salasynyń kórsetkishi tómen bolǵanyn aıtyp ótti.
«Qazir kezekte turǵan 30 270 adam bar. Onyń ishinde «Otbasy banki» salymshylarynyń ózi ǵana – 8 myń adam. Onyń ishinde tek 600 adam ǵana birinshi jarnany tóleı alatynyn dáleldep otyr. Problemalar bar. Biraq biz bıyl aldymyzǵa jospar qoıdyq: 644,7 myń sharshy metr úı beriledi. Onyń ishinde birinshi Qyzylorda qalasy jáne aýdandar boıynsha arnaıy úı salý ınfraqurylymdaryn daıyndap qoıdyq. Ekinshiden, Úkimetpen birge qazirgi baǵdarlamalarǵa baılanysty arendalyq jáne nesıelik úıler boıynsha jumys isteımiz», - dedi ol.
Eske sala ketsek Memleket basshysy Qasym-Jomart Toqaevtyń tóraǵalyǵymen Úkimettiń keńeıtilgen otyrysy ótip jatyr. Onlaın formattaǵy jıynda eldiń áleýmettik-ekonomıkalyq damýynyń 2020 jylǵy qorytyndylary men aldaǵy jospary talqylanýda.
