Memleket basshysy Qytaıdyń Qazaqstandaǵy elshisi Chjan Sıaony qabyldady
Prezıdent Qasym-Jomart Toqaev daǵdarystan keıingi kezeńde Qazaqstannyń Qytaı Halyq Respýblıkasymen kópjaqty strategııalyq seriktestigin odan ári damytýǵa qatysty naqty ustanymyn jetkizdi.
«Qazaqstan men QHR arasyndaǵy ózara yntymaqtastyq pen strategııalyq seriktestik ártúrli saıası tendentsııalarǵa emes, berik negizge qurylǵan. Qazaqstan men Qytaı – jaqyn kórshi, senimdi dos jáne strategııalyq áriptes. Bul yntymaqtastyq Qazaqstannyń ulttyq múddesine saı keledi. Elderimizdiń arasyndaǵy barlyq másele syndarly ári senimdi dıalog arqyly sheshiledi», – dedi Memleket basshysy.
QHR Tóraǵasy Sı Tszınpınge ystyq sálemin joldaǵan Qazaqstan Prezıdenti qytaı basshysyn ózine yńǵaıly ýaqytta elimizge memlekettik saparmen kelýge shaqyrdy. Qasym-Jomart Toqaev Qazaqstan men Qytaıdyń COVID-19 pandemııasy bastalǵannan bergi bir-birine kórsetken ózara kómegin joǵary baǵalady. Kezdesýde Qazaqstannyń qytaıdan vaktsına alýdy josparlap otyrǵany, reseılik «Spýtnık V» ekpesimen jáne otandyq «QazVac» vaktsınasyn qoldaný arqyly Úkimettiń halyqqa jappaı ekpe salý jumysy ekpindi túrde iske asatyny aıtyldy.
Bıyl Qazaqstannyń Táýelsizdik alǵanyna jáne Qazaqstan men Qytaı arasyndaǵy dıplomatııalyq qatynastardyń ornaǵanyna 30 jyl tolyp otyr. Memleket basshysynyń pikirinshe, alda kele jatqan osynaý mereıtoılyq mezet buǵan deıin júrip ótken joldyń salmaǵyn uǵynýǵa, strategııalyq seriktestiktiń jańa maqsattaryn anyqtaýǵa jaqsy múmkindik beredi. Qasym-Jomart Toqaev osy ýaqyt aralyǵynda eki el óziniń damý jolynda, sondaı-aq, jan-jaqty yntymaqtastyqty nyǵaıtýda aıtarlyqtaı nátıjelerge qol jetkizdi dep sanaıdy.
Memleket basshysy qytaı halqyn eldegi kedeılikti túp tamyrymen joıý jónindegi tarıhı mindetti oryndaýymen, koronavırýs indetimen kúrestegi jeńisimen jáne ekonomıkany qaıta qalpyna keltirýdegi úlken jetistigimen quttyqtady.
Prezıdent Qazaqstannyń joǵary deńgeıdegi saıası baılanystardy nyǵaıtýǵa, ekonomıkalyq qarym-qatynastardy keńeıtýge ázir ekenin rastady. QHR – Qazaqstannyń eń iri syrtqy saýda seriktesi. 2020 jyly eki el arasyndaǵy taýar aınalymy 15 mıllıard dollardy qurady.
Ekijaqty saýda jáne ınvestıtsııalyq baılanystardy ornyqty jáne teńgerimdi damý deńgeıine shyǵarý úshin Memleket basshysy Qazaqstan-Qytaı shekarasyndaǵy avtomobıl jáne temirjol ótkizý pýnktteriniń jumysyn qalypty rejımge qaıtarýǵa, pandemııadan keıingi kezeńde olardyń ótkizý qabiletin arttyrýǵa qatysty usynystar aıtty. Prezıdent azamattar men júk tasymaldaıtyn turaqty áýe reısterin qaıta qalpyna keltirýge múmkindik bar dep sanaıdy. Tsıfrlandyrý, jasyl ekonomıka, ınnovatsııa sekildi salalar boıynsha aıtarlyqtaı jetistikke jetken Qytaı tarapymen yntymaqtastyqty damytý úshin ekijaqty kúsh-jigerdi jumyldyrý asa mańyzdy.
Qasym-Jomart Toqaev Qazaqstannyń «Nurly jol» strategııasyn Qytaıdyń «Bir beldeý jáne bir jol» bastamasymen ushtastyrý jónindegi jumysty jandandyrý qajettigin atap ótti. Sondaı-aq Qazaqstannyń 2025 jylǵa deıingi damýynyń ulttyq josparynan jáne qytaıdyń «Qos aınalym» tujyrymdamasynan týyndaıtyn ózara tıimdi kooperatsııany tereńdetý múmkindikterin tolyqqandy paıdalanýǵa shaqyrdy.
Memleket basshysy halyqaralyq deńgeıdegi basty máseleler boıynsha Qazaqstan men Qytaıdyń ustanymdary sáıkes keletinin aıtty. Prezıdent Azııadaǵy ózara yqpaldastyq jáne senim sharalary keńesin qoldaǵany úshin qytaı tarapyna rızashylyǵyn bildirip, Birikken Ulttar Uıymy, Shanhaı yntymaqtastyq uıymy sheńberinde jáne «Ortalyq Azııa + Qytaı» yntymaqtastyq formatynda da odan ári birlesip jumys isteýge Qazaqstannyń daıyn ekenin jetkizdi.