Memleket basshysy: Kýveıt memleketimen qarym-qatynas júıeli damyp keledi

ASTANA. QazAqparat - Qazaqstan men Kýveıttiń qarym-qatynasy júıeli damý ústinde. Búgin Aqordada Qazaqstandaǵy birqatar elderdiń Elshilerinen senim gramotalaryn qabyldaý kezinde Elbasy Nursultan Nazarbaev osylaı málim etti.

«Kýveıt memleketimen qarym-qatynastyń júıeli damyp kele jatqanyn atap aıtqym keledi. Byltyr Kýveıtte Qazaqstan elshiligi, al bıyl Astanada Kýveıt elshiligi ashyldy. Bul dıplomatııalyq mıssııalar saıası, saýda-ekonomıkalyq qarym-qatynasty nyǵaıtýǵa zor áserin tıgizedi dep senemin. Bul oraıda, joǵary deńgeıdegi saparlardyń mańyzy zor ekeni anyq», - dedi Elbasy.

Aıta keteıik, búgin Aqordada QR Prezıdenti Nursultan Nazarbaev Qazaqstandaǵy birqatar elderdiń elshilerinen senim gramotalaryn qabyldady.

Atap aıtqanda, senim gramotalaryn Kýveıttiń Tótenshe jáne Ókiletti Elshisi Tarek Abdýlla ál-Faradj, AQSh Elshisi Djordj Albert Krol, Pákistan Elshisi Abdýl Salık Han, Bolgarııa Elshisi Vasıl Petkov, sondaı-aq, Saýd Arabııasynyń Tótenshe jáne Ókiletti Elshisi Gýrm ben Saıd ál-Mılhan tapsyrdy.