Memleket basshysy kúsh qurylymdaryna birqatar tapsyrmalar berdi
ASTANA. QazAqparat - Memleket basshysy Nursultan Nazarbaev memlekettik organdar basshylarymen jáne arnaýly maqsattaǵy bólimshelerdiń komandırlerimen keńes ótkizdi.. Bul týraly Aqordanyń baspasóz qyzmetinen habarlady.
Memleket basshysy memlekettik organdar basshylarymen jáne arnaýly maqsattaǵy bólimshelerdiń komandırlerimen keńes ótkizdi.
Іs-sharaǵa Prezıdent Ákimshiliginiń Basshysy N.Nyǵmatýlın, Prezıdenttiń kómekshisi - Qaýipsizdik Keńesiniń hatshysy N.Ermekbaev, Ulttyq qaýipsizdik komıtetiniń, Qorǵanys mınıstrliginiń, Іshki ister mınıstrliginiń jáne Memlekettik kúzet qyzmetiniń basshylary qatysty.
Keńes barysynda mınıstrlikter men vedomstvolardyń arnaýly maqsattaǵy kúshteriniń áskerı daıyndyǵy jáne ony ári qaraı damytý, olardyń arasyndaǵy ózara is-qımyl jáne materıaldyq-tehnıkalyq qamtamasyz etý máseleleri talqylandy.
Elbasy búginde arnaýly maqsattaǵy bólimshelerge júktelgen qyzmettiń mańyzdylyǵyn eskere otyryp, olarǵa aıryqsha kóńil bólinip otyrǵanyn aıtty. Qazaqstan Prezıdenti osy bólimshelerdiń sarbazdary men ofıtserleri terrorızmge qarsy kúres, quqyq tártibin, qoǵamdyq tynyshtyq pen konstıtýtsııalyq qurylymdy qorǵaý jónindegi qyzmetti tıimdi júzege asyryp otyrǵanyn atap ótti.
Nursultan Nazarbaev arnaýly qyzmet kúshteri arqyly Aqtóbe jáne Almaty oblystarynda, Almaty qalasynda kúrdeli jaýyngerlik sharalar iske asyrylǵanyn, al «Arystan» qyzmetiniń jasaqtary 1992 jyly Shymkentte kepilge alynǵandardy bosatý jónindegi erekshe operatsııa barysynda alǵashqy áskerı tájirıbe jınaǵanyn eske saldy.
«Osylaısha, arnaýly maqsattaǵy bólimsheler áskerı ýaqytta da, beıbit kezde de qajet bolady. Arnaýly maqsattaǵy jasaq jaýyngeriniń kúndelikti qyzmeti ómirine qaýipti qaterlermen baılanysty psıhofızıkalyq zor aýyrtpalyqtarǵa toly. Bul aıryqsha daıyndyq pen mashyqty, óz isin jetik meńgerýdi, qarý qoldana bilýdi, sondaı-aq psıhologııalyq ornyqtylyqty qajet etedi», - dedi Nursultan Nazarbaev.
Keńes qorytyndysy boıynsha Memleket basshysy múddeli memlekettik organdar basshylary men arnaýly maqsattaǵy bólimsheler komandırlerine birqatar tapsyrma berdi.
