Memleket basshysy QR-da dýaldy oqytýdy engizýde Eýropa tájirıbesin zertteýdi tapsyrdy
ASTANA. QazAqparat - Memleket basshysy Nursultan Nazarbaev Qazaqstanda dýaldyq oqytý júıesin engizýde eýropalyq tájirıbeni muqııat zertteý qajettigin tapsyrdy.
Prezıdent tıisti tapsyrmany Bilim jáne ǵylym mınıstri Aslan Sárinjipovpen kezdesý kezinde berdi, dep habarlady Aqordanyń baspasóz qyzmeti.
N.Nazarbaev bilim berý, sonyń ishinde ınnovatsııalyq bilim berý damýdyń eń basty máselesi bolyp otyrǵanyn atap kórsetti.
«Jastardyń mektepte oqýynyń, tehnıkalyq-óndiristik jáne joǵary bilim alýynyń mańyzy zor. Kompanııalar memlekettiń kómegimen jastardy daıarlaý máselesin óz moınyna alýy úshin dýaldyq oqytý júıesin damytqan jón. Ol úshin Eýropa elderiniń tájirıbesin taǵy da muqııat zertteý qajet», - dedi Qazaqstan Prezıdenti.
Qazaqstan Prezıdenti ýnıversıtetterdiń avtonomdy bolý qaǵıdattaryn aıqyn túsiný qajettigin de atap ótti.
«Avtonomdy bolý oqý baǵdarlamalaryna, biliktilikti arttyrý máselelerine, bilim sapasyna, tájirıbeli oqytýshy-professorlyq quramdy tartýǵa qatysty. Alaıda keıbireýler avtonomdylyqty joǵary oqý ornynyń derbestigi, rektorlarynyń ózgermeıtindigi, odan ári jekeshelenýi dep túsinýde. Sondyqtan joǵary oqý oryndarynyń avtonomdy bolýynyń maqsaty, mindetteri jáne sharttaryna qatysty naqty baǵdardy aıqyndap bergen jón», - dedi Memleket basshysy.
