Memleket basshysy Qostanaı oblysynyń ákimine birqatar tapsyrma berdi
QOSTANAI.QazAqparat - Memleket basshysy Qasym-Jomart Toqaev Qostanaı oblysynyń ákimi Arhımed Muhambetovpen telefon arqyly sóılesti, dep habarlaıdy QazAqparat Qostanaı oblysy ákiminiń baspasóz qyzmetine silteme jasap.
Oblys basshysy QR Prezıdentine koronavırýsqa qarsy kúres, óńirdegi sanıtarlyq-epıdemıologııalyq jaǵdaı jáne karantındik sharalardy iske asyrý barysyn baıandady. Sondaı-aq, azamattarǵa áleýmettik kómek kórsetý, ShOB-tyń jumys rejımine birtindep shyǵýyn qamtamasyz etý, egis jumystary jáne «Jumyspen qamtýdyń Jol kartasyn» iske asyrý boıynsha Prezıdent tapsyrmalaryn iske asyrý barysy jaıynda esep berdi.
Búginde óńirde koronavırýstyq ınfektsııany juqtyrýdyń 7 jaǵdaıy tirkelgen, 1 adam qaza tapty. Qostanaı oblysynda ınfektsııanyń aldyn alý maqsatynda 1 228 medıtsınalyq tósek-oryn jabdyqtalǵan.
«Aldyn ala bekitilgen algorıtmge sáıkes koronavırýstyq ınfektsııanyń bar-joǵyna 3376 zertteý júrgizildi. Úı karantınine 1068 adam ornalastyryldy. Infektsııanyń odan ári taralýyna jol bermeý maqsatynda 17 sáýirde saǵat 00:00-den bastap Qostanaı oblysynyń aýmaǵynda shekteý sharalaryn qataıtý arqyly karantın rejımi engizildi. Karantın rejımin 29 blokpost, 33 mobıldik patrýl jáne 300-den astam polıtsııa qyzmetkeri qamtamasyz etedi. Alǵashqy eki kún ishinde polıtsııa halyq arasynda karantındik sharalardy saqtaý jóninde túsindirý jumystaryn júrgizetin bolady. Sodan keıin TJ rejımin buzǵany úshin aıyppul sanktsııalaryn qoldana bastaıdy. TJ rejımi bastalǵannan beri 408 quqyq buzýshy ákimshilik jaýapkershilikke tartyldy, onyń 40-y qamaýǵa alyndy. Qostanaı oblysy kóktemgi egiske tolyq daıyn. Jaqyn kúnderi jer óńdeý, ylǵaldy jabý jumystary bastalady. Aýyl sharýashylyǵy qurylymdary tolyq kólemde (528 myń tonna) tuqymmen qamtamasyz etilgen. Kóktemgi egis jumystaryna 22,9 myń traktor, 1032 egis kesheni jumyldyrylmaq.Tehnıka 100% daıyn. Oblys boıynsha 71 myń tonna arzandatylǵan JJM bólindi, jetkizý kestege sáıkes júzege asyrylady», - dedi óńir basshysy telefon arqyly.
Oblysta Jumyspen qamtýdyń jol kartasy aıasynda ınfraqurylymdyq jobalardy iske asyrýǵa shamamen 54 mlrd teńge bólindi, 13 myńnan astam jumys orny qurylady.
Aımaq basshysynyń esebin tyńdaǵan Prezıdent oǵan birqatar naqty tapsyrmalar júktedi.
