Memleket basshysy Kóshpendiler oıyndarynyń ashylýyna qatysýda

ShOLPAN-ATA. QazAqparat - Búgin Ystyq kóldiń jaǵasynda III Dúnıejúzilik kóshpendiler oıyndary resmı túrde ashyldy. Saltanatty shara Sholpan-Ata qalasynyń ıppodromynda ótip jatyr. Oǵan QR Prezıdenti Nursultan Nazarbaev qurmetti qonaq retinde qatysýda, dep xabarlaıdy QazAqparat tilshisi.

Dúnıejúzilik kóshpendiler oıyndary - eki jylda bir ret ótetin shara. Buǵan deıin atalǵan sport dodasy eki ret Qyrǵyzstanda uıymdastyryldy. Sol kezde ony tek qyrǵyz jerinde ǵana ótkizý týraly sheshim bolǵan. Alaıda osy joly Qyrǵyzstannyń bıligi erejeni ózgertip, kóshpendiler oıyndaryn estafetamen ótkizýdi uıǵardy. Kelesi oıyndar 2020 jyly Túrkııada ótetin boldy.

  Bıylǵy dodaǵa Qazaqstan óz quramasyn kúsheıtip, burynǵydan úsh ese artyq sportshylardy ákelip otyr. Jalpy, Kóshpendiler Olımpıadasyna álemniń 60-tan astam elinen 2 myńǵa jýyq sportshy qatysady. Olardyń ishinde Aýǵanstan, Bolgarııa, Belarýs, Úndistan, Iran, Mońǵolııa, Qytaı, Pákistan, Polsha, Tájikstan, Túrikmenstan, Ózbekstan, AQSh, Ýkraına, Frantsııa, Shrı-Lanka jáne taǵy basqa elderdiń sportshylary bar. Barlyǵy 37 ulttyq sport túri -  kúres, sadaq atý, ıtpen ań aýlaý, at jarys, kókpar, asyq atý jáne taǵy basqa jarystar boıynsha synǵa túsedi. Saıystar Sholpan-Atanyń ıppodromynda jáne Qyrshyń shatqalynda ótedi.

Buǵan deıin QazAqparat tilshisi Qyrshyń shatqalyna baryp, sol jerdegi daıyndyq sharalaryn kórip qaıtty.  Budan bólek, qazaqstandyq sportshylar jatqan shıpajaıda bolyp, olardyń turmys jaǵdaıymen tanysty. 

Búgin resmı ashylý saltanatyna deıin tájik kúresinen saıystar ótti. Qazaqstannyń palýany Muratxan Berikbol 68 keli salmaqta qola medaldy jeńip aldy. Asa aýyr salmaqta Maqsat Jandildaev ta qola júldeger atandy. Jalpy, sarapqa 594 medal (174 altyn, 173 kúmis jáne 247 qola) salynady. Al III Dúnıejúzilik kóshpendiler oıyndarynyń syıaqy qory 26 mıllıon somdy qurap otyr. Bul qazirgi kýrspen 136,5 mıllıon teńge nemese 381,3 myń dollardy quraıdy. 

Aıta keteıik, bıylǵy oıyndar Túrki elderi yntymaqtastyq keńesiniń VI sammıti qarsańynda uıymdastyrylyp otyr. Erteń, keńestiń resmı otyrysy ótedi. Oǵan Qazaqstan, Qyrǵyzstan, Túrkııa men Ázerbaıjannyń prezıdentteri qatysady. Ózbekstan basshysy da keledi degen jospar bar. Sammıttiń taqyryby - "Jastar saıasaty jáne ulttyq sport túrleri salasyndaǵy yntymaqtastyq". Otyrysta Qazaqstan Túrki keńesiniń tóraǵalyǵyn Qyrǵyzstanǵa tapsyrady. Al xatshylyqtyń basshylyǵyna Qazaqstannyń ókili taǵaıyndalady. Budan bólek, birqatar qujattarǵa qol qoıylady degen jospar bar. 
           

Basty sýret: akorda.kz