Memleket basshysy koronavırýsqa qatysty testileý kólemin arttyrýdy tapsyrdy
NUR-SULTAN. QazAqparat – Memleket basshysy Qasym-Jomart Toqaev koronavırýsqa qatysty testileý kólemin arttyrýdy tapsyrdy, dep habarlaıdy QazAqparat tilshisi.
«Epıdemııany aýyzdyqtaý – ońaı sharýa emes. Onyń ekonomıkaǵa jáne halyqtyń ál-aýqatyna tıgizetin saldaryn barynsha azaıtý – mańyzdy mindet. Biz jan-jaqty oılastyrylǵan jáne naqty sharalar qabyldaýymyz kerek», - dedi Memleket basshysy koronavırýs indetiniń ekinshi kezeńine daıyndyq máseleleri boıynsha keńeste.
Osy oraıda prezıdent birqatar túıtkildi máselelerge toqtaldy.
«Testileý kóleminiń tómendeýi úrdisi baıqalyp otyr. Táýligine 40-tan 60 myńǵa deıin zertteý júrgizý múmkindigi bolǵanymen, ortasha eseppen 18 myń zertteý jasalýda. Zerthanalardyń júktemesi 40 paıyz shamasynda», - dedi Q. Toqaev.
Prezıdent óńirlik bóliniste kólemdi teńestirýge qol jetkizilmegenin eskertti. Bıylǵy 5 qazandaǵy jaǵdaı boıynsha 100 myń adamǵa shaqqandaǵy esepteýde testileýdiń tómengi deńgeıi Qyzylorda, Almaty oblystarynda, Shymkent qalasynda anyqtalǵan, al joǵary deńgeı Atyraý, Batys Qazaqstan oblystarynda tirkeldi.
Zertteýlerdiń eń joǵary kólemi bıylǵy maýsym aıynda júrgizilgen, ıaǵnı táýligine 33 myńǵa jetti. 2020 jylǵy 5 qazanda 11 myńǵa jýyq zertteý jasaldy.
Qazirgi jaǵdaıda mundaı kórsetkish óte az ekenine toqtalǵan Prezıdent, «biz naqty ahýaldy bilýimiz kerek. Sondyqtan da testileýden ótkizý kólemin arttyrý boıynsha sharalar qabyldaǵan jón», - dedi.
Memleket basshysynyń aıtýynsha, zerthana jelisi keńeıtilip, barsha álemde testileý quny tómendegenine qaramastan, elimizde testileý baǵasy áli de joǵary bolyp tur. Bul turǵyda 10-nan 18 myń teńgege deıin jetedi.
«Halyqtyń basym bóligine bul soma tıimsiz bolyp tur dep sanaımyn. Úkimet pen ákimderden testileýdiń qarjylyq máselesin sheshý talap etiledi», - dedi Qasym-Jomart Toqaev.
