Memleket basshysy Konstıtýtsııamyzdyń kepili ekenin taǵy dáleldedi - M.Joldasbekov
ASTANA. 12 aqpan. QazAqparat /Aıdar Ospanalıev/ - Memleket basshysy Nursultan Nazarbaev Prezıdenttikke kandıdat bolyp umtylyp jatqan azamattardyń barlyǵynyń atqarǵan qyzmetterine qaramastan zań aldynda birdeı ekenin dáleldedi.
Bul týraly búgin Prezıdenttikke kandıdattardyń memlekettik tildi erkin meńgergendigin anyqtaý jónindegi lıngvıstıkalyq komıssııanyń tóraǵasy Myrzataı Joldasbekov Ortalyq saılaý komıssııasynyń otyrysynda aıtty.
«Keshe lıngvıstıkalyq komıssııa úshinshi emtıhandy ótkizdi. Osyǵan qaraı keshe Prezıdentikke kandıdat retinde óziniń memlekettik tildi erkin meńgergendigin dáleldeý úshin emtıhanǵa Elbasy keldi. Osy joly da Elbasy Konstıtýtsııamyzdyń kepili ekendigin, jalpy Prezıdenttikke kandıdat bolyp otyrǵan azamattardyń barlyǵynyń atqarǵan qyzmeti men laýazymyna qaramastan zań aldynda birdeı ekendigin dáleldedi»,-dedi komıssııa tóraǵasy.
Onyń aıtýynsha, Prezıdent emtıhanǵa berilgen úsh synnan da jaqsy ótti. «Biz komıssııa músheleri biraýyzdan Elbasy qazaq tilin erkin meńgergen degen baılamǵa keldik. Tipti erkin meńgergen degen sóz de az bolǵandaı. Elbasy qazaq tilin jetik meńgergen degen qorytyndy jasadyq. Onyń ústine keshe komıssııa májilisti qorytyndylaǵannan keıin Elbasymen tildiń taǵdyry, tildiń keleshegi jóninde salıqaly áńgime boldy. Barshaǵa málim lıngvıstıkalyq komıssııa músheleri elimizge belgili degen ǵalymdar men til, ádebıet salasynyń mamandarynan qurylǵan. Sondyqtan keshe Prezıdentke men biraz usynystarymdy aıttym. Komıssııa músheleri de ózderiniń tilge qatysty kókeılerinde júrgenderin jetkizdi. Prezıdent sol aıtylǵandardyń barlyǵyn qaǵazqa túrtip otyrdy. Biz Prezıdenttiń komıssııa májilisinen jaqsy bir sezimmen shyǵyp bara jatqanyn kórdik»,-dedi M.Joldasbekov.
