Memleket basshysy qomaqty somaǵa nesıe boryshkeri atanǵan agrarlyq fırmalardy bankrottaýdy talap etýde

ASTANA. QazAqparat - Búgin Aqordada Ulttyq ınvestorlar keńesiniń otyrysynda Memleket basshysy Nursultan Nazarbaev aýqymdy nesıelerdi jınaqtaǵan agrarlyq sektordyń kásiporyndaryn bankrotqa ushyratýdy talap etti.

«Jyl saıyn egis naýqany men egin oraǵy kezinde agrarlyq sektorda nashar nesıeler jınalady. Barlyǵy qomaqty soma. Boryshker retinde tórt iri kompanııa belgili bolyp otyr. 800 mıllıard teńge tórt kompanııaǵa tıesili. Atap aıtqanda, osylardyń jartysyn bankrottaýǵa bolar edi, ıaǵnı eki kompanııany. Álemdegi bıznes osylaısha jumys isteıdi», - dedi Memleket basshysy. Prezıdenttiń sózine qaraǵanda, bundaı kompanııalarǵa basqa ınvestorlar, jaqsy menedjment kelýi tıis. Kanada men AQSh-ta mıllıondaǵan kompanııalar bankrotqa ushyrap, mıllıondaǵan jańa kompanııalar qurylyp jatyr jáne bul qalypty úderis. «Bizde osy kúnge deıin halyq nesıeni qaıtarý kerek ekenine úırene almaı keledi. Alaıda, qaryzdy qaıtarý kerek! Bul zań!», - dep atap ótti N. Nazarbaev. Sóz sońynda Elbasy Úkimetke agrarlyq saladaǵy boryshkerler máselesin sheshýdi tapsyrdy.