Memleket basshysy: Qoǵamdyq keńestiń rólin arttyra túsý qajet

NUR-SULTAN. QazAqparat – Kvazımemlekettik sektorda qoǵamdyq keńes qurý múmkindigin qarastyrý kerek. Bul týraly búgin Qazaqstan halqyna Joldaýyn jarııa etken QR Prezıdenti Qasym-Jomart Toqaev aıtty, dep habarlaıdy QazAqparat tilshisi.

«Qoǵamdyq keńesterdiń rólin arttyra túsý qajet. Olardy satyp alýdy uıymdastyratyn komıssııalardyń jumysyna tartý kerek. Sondaı-aq kvazımemlekettik sektorda qoǵamdyq keńester qurý múmkindigin qarastyrǵan durys. Parlament qaraýyndaǵy tıisti zań jobasyn jyl aıaǵyna deıin qabyldaǵan jón», - dedi Memleket basshysy.

Sonymen qatar, QR Prezıdenti qoǵamdyq keńesterdiń quramyna túrli áleýmettik top ókilderin keńinen tartý qajettigin basa aıtty.

«Mysaly, biz múmkindigi shekteýli jandar osyndaı uıymdardyń jumysyna aralasyp, óz únin jetkizýi úshin qolaıly jaǵdaı jasaýymyz kerek. Olar árqashan memlekettiń erekshe nazarynda turýǵa tıis», - dedi Qasym-Jomart Toqaev.