Memleket basshysy Qazaqstannyń kórnekti qoǵam qaıratkeri Jumaǵalı Ysmaǵulovtyń otbasy men týǵan-týystarynyń qaıǵysyna ortaqtasyp kóńil aıtý hatyn joldady

"Belgili qalamger, sheber aýdarmashy, kórnekti ádebıetshi ǵalym Jumaǵalı Ysmaǵulovtyń dúnıeden ótýine baılanysty otbasy men týǵan-týystaryna aýyr qaıǵylaryna ortaqtasyp kóńil aıtamyn. Bul kisi bilimimen, shyǵarmashylyǵyndaǵy jasaǵan túr-tulǵasymen, boıyndaǵy azamattyq asyl qasıetterimen halqymyzdyń shynaıy qadir-qurmetine bólengen tulǵa edi. Eńbeksúıgishtigi, ustamdylyǵy, tazalyǵy, elin-halqyn súıýi sııaqty qasıetteriniń arqasynda jaýapty qyzmetterdi abyroımen atqardy. Onyń eńbegin halqymyz umytpaıdy dep oılaımyn. Topyraǵy, torqa, jany jannatta bolsyn", - delingen Memleket basshysynyń kóńil aıtý hatynda.

Sondaı-aq J. Ysmaǵulovtyń qazasyna baılanysty marqumnyń otbasy men týǵan-týystaryna kóńil aıtý hatyn QR Memlekettik hatshysy - Syrtqy ister mınıstri Qanat Saýdabaev, Mádenıet mınıstri Muhtar Qul-Muhammed, Qostanaı oblysynyń ákimi Sergeı Kýlagın jáne taǵy basqa da azamattar joldap otyr.

J. Ysmaǵulov Almatydaǵy Keńsaı-2 zıratyna jerlenbek.

Eske sala keteıik, Jumaǵalı Ysmaǵulov 14 qańtar kúni Almatyda uzaqqa sozylǵan aýyr naýqastan 83 jasqa qaraǵan shaǵynda dúnıeden ozdy.

Jumaǵalı Ysmaǵulov1928 jyly 17 sáýirde Qostanaı oblysynyń Sarykól aýdanyndaǵy Sonaly aýylynda týǵan. Orta mekteptiń 8 klasyn bitirgennen keıin, 1942 jyly alǵashynda Áýlıekóldegi aýdandyq gazet baspahanasynda árip terýshi, sosyn aýdandyq gazet redaktsııasynda jaýapty hatshy bolyp istegen. 1951 jyly Qazaq memlekettik ýnıversıtetiniń jýrnalıstıka fakýltetin bitirgen. 3-kýrs stýdenti kezinde-aq "Kommýnıst" (qazirgi "Aqıqat") jýrnalynda partııa turmysy bóliminiń meńgerýshisi bolyp istedi, kóp uzamaı onyń jaýapty hatshysy jáne redaktsııa alqasynyń múshesi boldy. 1952-1987 jj. "Úgitshi bloknoty" ("Bloknot agıtatora") jýrnalynyń jaýapty redaktory, Qazaqstan KP Ortalyq Komıtetinde nusqaýshy, respýblıkalyq "Qazaq ádebıeti" gazetiniń bas redaktory, Almaty oblystyq "Jetisý", Shyǵys Qazaqstan oblystyq "Kommýnızm týy" gazetteriniń redaktsııalarynda jaýapty qyzmetker, Qazaqstan Kompartııasynyń Ortalyq Komıteti janyndaǵy Partııa tarıhy ınstıtýtynda aýdarma sektorynyń meńgerýshisi, Qazaq KSR Mınıstrler Keńesi janyndaǵy Memlekettik aqparat agenttigi (QazTAG) dırektorynyń orynbasary, dırektory bolǵan. 1985 jyly on birinshi saılanǵan Qazaq KSR Joǵarǵy Keńesiniń depýtaty, al 1986 jyly Qazaqstan Kompartııasynyń XVI sezinde Ortalyq Komıteti músheligine kandıdat bolyp saılandy.

1987 jyldan bastap M. O. Áýezov atyndaǵy Ádebıet jáne óner ınstıtýtynda aǵa ǵylymı qyzmetkeri bolyp istegen. 1994 jyly "Abaı: aqyndyq taǵylymy" ("Ǵylym") atty monografııasy jaryq kórdi. 1995 jyly "Abaı poezııasyndaǵy ómir shyndyǵyn beıneleýdiń realıstik prıntsıpteri" degen problema boıynsha doktorlyq dıssertatsııa qorǵady. Abaıdyń shyǵarmashylyq murasyn bastyrý jáne zertteý jónindegi jumystary úshin Qazaqstan Respýblıkasy memlekettik syılyǵynyń laýreaty ataǵyna ıe boldy. 1996 jyly Qazaqstan Áleýmettik ǵylymdar akademııasynyń akademıgi bolyp saılandy. Keıingi kezde M. O. Áýezov atyndaǵy Ádebıet jáne óner ınstıtýtynda Abaıtaný bóliminiń meńgerýshisi bolyp istegen.

1991-1996 jyldary qoǵamdyq negizde Jazýshylar odaǵy basqarmasynyń janyndaǵy Kórkem aýdarma qaýymdastyǵy prezıdentiniń mindetin atqardy.

Uzaq jyldar boıy baspasóz betterinde jarııalanǵan maqalalarynyń birazy "Marjan men mahabbat" (1965), "Adam meıiri" (1968) atty jınaqtaryna engizildi.

Balzaktyń "Úzilgen úmitter", Stendaldyń "Qyzyl men qara", ıÝ. Bondarevtiń "Jaǵalaý" jáne "Tańdaý", V. Anchıshkınniń "Arktıka ańyzy" romandaryn, V. Daldyń "Bekeı men Máýlen", E. Kazakevıchtiń "Kók dápter" povesterin tárjimalaǵan.

Qazaqstan Respýblıkasynyń eńbek sińirgen mádenıet qyzmetkeri (1992). Halyqtar Dostyǵy jáne "Qurmet Belgisi" ordenderimen jáne medaldarmen marapattalǵan