Memleket basshysy: Qazaqstandy jańǵyrtý - ortaq isimiz
ASTANA. QazAqparat - Qazaqstandy jańǵyrtý - ortaq isimiz. Búgin Astanadaǵy Táýelsizdik saraıynda qaıta saılanǵan Qazaqstan Prezıdenti Nursultan Nazarbaev Qazaqstan halqyna ant berip, qyzmetine resmı kirisken soń sóılegen sózinde osylaı dedi.
«Respýblıka» sózi latynnan tikeleı aýdarǵanda ortaq is degendi bildiredi. Sondyqtan Qazaqstandy jańǵyrtý - bul bizdiń ortaq isimiz. Aldymyzda qandaı da synaqtar bolmasyn, biz memleketimizdiń qýatyna, halqymyzdyń danalyǵyna súıene otyryp, ony eńserip shyǵamyz», - dedi Nursultan Nazarbaev.
Budan bólek, Elbasy Qazaqstan halqy kóptegen qıyndyqtardy eńserip ótkenin, endigi kúni jańa dáýirge sheshimdi qadam basyp otyrǵanyn jetkizdi.
