Memleket basshysy: Qazaqstanda volonterler sany az

NUR-SULTAN. QazAqparat – Qazaqstan Prezıdenti Qasym-Jomart Toqaev elimizdegi volonterlerdiń sanyn 100 myńǵa deıin jetkizý kerektigin aıtty, dep habarlaıdy QazAqparat tilshisi.

«Búgin de dúnıejúzinde volonterlik qyzmettiń aýqymy ósip, álemdik qozǵalysqa aınaldy. Qazirdiń ózinde jer betinde 1 mıllıardqa jýyq volonter bar. Bizde 16 myń – az. 100 myńǵa deıingi deńgeıge kóterýge bolady. Olardyń jahandyq damýǵa tıgizer úlesi zor. Álemniń jalpy ishki ónimniń 2,5 paıyzy – eriktiler eńbeginiń nátıjesi. Kóptegen elde erikti bolý – qalypty jaǵdaı, úlken qurmet sanalady. Jurtshylyq olardy syılaıdy», - dedi Memleket basshysy elordadaǵy Birgemiz» respýblıkalyq front-keńsesiniń ashylý saltanatynda.

Qasym-Jomart Toqaev máselen halqynyń jartysy volonter bolyp otyrǵan Frantsııa elin mysalǵa keltirdi. Onyń aıtýynsha, Germanııa men Japonııada da eriktilerdiń sany jyldan jylǵa kóbeıip keledi.

«Bizge osyndaı deńgeıge umtylýymyz kerek. Azamattarymyz ózgege qurmet kórsetýde aıanyp qalmaýy tıis. Sol arqyly qoǵamǵa áleýmettik jaýapkershilikti arttyramyz. Volonterlik – patrıotızmniń bir bóligi. Eriktiler eń aldymen el ıgiligine qyzmet etedi», - dedi ol.

Aıta ketsek, Prezıdent Qasym-Jomart Toqaev elordada EKSPO kórmesiniń «Art Hub» pavılonynda ornalasqan volonterlerdiń «Birgemiz» respýblıkalyq front-keńsesiniń ashylý saltanatyna qatysýda.

Volonter jyly aıasynda front-keńseniń ashylýy barysynda «QQQAZVOLUNTEER.KZ onlaın platformasynyń qyzmeti jáne volonterliktiń «Bilim», «Qamqor», «Úmit», «Sabaqtastyq», «Taza Álem» jáne «Saulyq» atty 7 salalyq baǵyt boıynsha alańdary tanystyrylady.

Front-keńse búkil Qazaqstannyń volonterleri úshin keńes berý, ádistemelik, oqytý jáne aqparattyq ortalyqqa aınalatyn bolady. Sondaı-aq, ol volonterlik jobalar men oqytý baǵdarlamalaryn úılestirý, monıtorıng jasaý, volonterlikti ilgeriletý boıynsha biryńǵaı aqparattyq saıasatty júrgizedi jáne biryńǵaı Call-ortalyqtyń jumysyn uıymdastyrady.