Memleket basshysy qazaq halqynyń san ǵasyr ańsaǵan armanyn iske asyrdy - M.Altynbaev
ANA. 6 qańtar. QazAqparat /Aıdar Ospanalıev/ - «Men elimizdiń tuńǵysh Prezıdenti-Elbasynyń ókilettigin uzartýǵa qatysty referendým ótkizý jónindegi depýtattardyń usynysyn qoldaımyn. Óıtkeni Memleket basshysy qazaq halqynyń san ǵasyr ańsaǵan armanyn iske asyrdy»,-dedi búgin Senat depýtaty Muhtar Altynbaev.
Bul týraly ol búgin Parlament Senatynyń jalpy otyrysynda bir top depýtattardyń Memleket basshysynyń ókilettigin uzartýǵa qatysty usynystaryn talqylaý barysynda málim etti.
Depýtattyń sózine qaraǵanda, 1991 jyly elimizdiń basyna týǵan qıyn-qystaý kezeńderde derbes memleket, táýelsiz Qazaqstandy qurý elimizdiń tuńǵysh Prezıdenti Nursultan Nazarbaevtyń qajyrly eńbeginiń, naǵyz erliginiń arqasynda múmkin boldy. «Prezıdent zamannyń san alýan synynan eldi aman alyp shyǵyp, turaqty jáne ornyqty saıasatynyń arqasynda qarapaıym halyqqa aýyrtpashylyǵyn tıgizbeı, qazaqstandyqtardy orasan zor jetistikterge, bereke-birlikke, yntymaqqa úndeı otyryp, eldiń ósip-órkendeýine qol jetikizdi. Ekonomıkany naryq arnasyna kóshirip, ıadrolyq qarýdan azat etti, 2030 strategııasyn qabyldap, ulttyq qor quryp, elordasyn aýystyryp, ony dúnıejúzine tanytty. Tuńǵysh Prezıdentimizdiń Joǵarǵy Bas qolbasshy retinde elimizdiń qaýipsizdigin nyǵaıtý jolynda Qazaqstanda buryn bolmaǵan, ashyq aspanymyzdy qas qaqpaı kúzetetin aıbyndy armııamyzdy qurdy», - dedi M.Altynbaev.
Onyń pikirinshe, Memleket basshysy armııamyzdy quryp qana qoımaı, onyń reformalaý barysyn jiti qadaǵalap, tipti tikeleı basshylyq jasap, qoldaý kórsetýde. Sonyń arqasynda elimizben birge armııamyz da ósip qabyrǵaly elderdiń áskerlerimen terezesi teńeldi.
