Memleket basshysy: Kásipkerlerge qarsy qozǵalǵan árbir altynshy is toqtatyldy

ASTANA. QazAqparat – Prezıdent Qasym-Jomart Toqaev «Altyn sapa» jáne «Paryz» syılyqtarynyń ıegerlerin marapattaý saltanatynda sóılegen sózinde mıkro jáne shaǵyn bıznesti tekserýge jarııalanǵan moratorıı taǵy bir jylǵa ne úshin uzartylǵanyn aıtty, dep habarlaıdy QazAqparat tilshisi.

«Kásipkerlerge qarsy qozǵalǵan árbir altynshy is, bul 312 istiń 59-y degen sóz, qylmystyq zańsyzdyqtyń bolmaýyna baılanysty toqtatyldy. Bıyldan bastap azamattyq tártipti shaǵymdanýdyń búkil joldary túgesilgenshe qylmystyq is qozǵaýǵa tyıym engizildi», - dedi Qasym-Jomart Toqaev.

Sondaı-aq, Memleket basshysy kásipkerlerdi qorǵaýdyń júıeli tetikteri engizile beretinin atap ótti.

«Ótken jyldardyń jaǵymdy qorytyndysyna súıene otyryp, men mıkro jáne shaǵyn bıznesti tekserýge jarııalanǵan moratorııdi taǵy bir jylǵa uzartý týraly sheshim qabyldadym. Tıisti Jarlyqqa qol qoıyldy. Biz kásipkerlerdi qorǵaýdyń júıeli mehanızmderin engizýdi sózsiz jalǵastyramyz», - dedi Prezıdent.

Aıta keteıik, osynaý saltanatty shara aıasynda úzdik dep tanylǵandarǵa «Qazaqstannyń úzdik taýary», «Qazaqstan Project Management Awards -2022», «TMD boıynsha sapa salasyndaǵy 2021 jyldyń syılyǵy» sııaqty kásipkerlik baǵyttaǵy marapattar da tabystaldy.

Sondaı-aq, «ArýAna», «Bıznes Kemeldilik», «Іsker», «Uly dala eli» syılyqtarynyń jeńimpazdary da marapattaldy.

Bıyl «Altyn sapa» syılyǵyna 281 úmitker ótinim tapsyrǵan. Sarapshylar sonyń ishinen iri, orta jáne shaǵyn bıznes boıynsha 14 bıznes nysanyn 4 atalym negizinde iriktep aldy.