Memleket basshysy kásipkerge dánýatqysh apparatyn syıǵa tartty

JAMBYL OBLYSY. QazAqparat - Memleket basshysy qarapaıym aýyl turǵynynyń turmys-tirshiligimen tanysý úshin jeke qosalqy sharýashylyǵyn júrgizip otyrǵan Qostóbe aýyly turǵynynyń úıine bardy, dep habarlaıdy Aqorda.

Aýyl turǵyny Salamat Rahmanberdıev 2020 jyly «Aýyl amanaty» baǵdarlamasy aıasynda 2,5 paıyzben 3,6 mıllıon teńge nesıe alyp, 6 bas múıizdi iri qara, 3 bas jylqy, 10 bas qoı satyp alǵan.

Kásipker mal bordaqylap satýmen aınalysady. Qazir tól basyn arttyryp, tapqan tabysyna júk kóligin satyp alǵan. Ol óz nápaqasyn tabýmen qatar, aýyldyń eki turǵynyn jumyspen qamtyp otyr.

Salamat Rahmanberdıev aldaǵy ýaqytta jem satatyn dúken ashyp, mal basyn kóbeıtý úshin taǵy da jeńildikpen 10 mıllıon teńge kredıt alýǵa nıettenip otyrǵanyn jetkizdi.

Memleket basshysy eńbekqor jigittiń kásibine tabys tilep, óz atynan dánýatqysh apparatyn syıǵa tartty.

Eske salaıyq, Prezıdent Jambyl oblysynda jumys saparymen júr.

Q.Toqaev jazýshy Sherhan Murtazanyń eskertkishine gúl shoǵyn qoıǵannan keıin zııaly qaýym ókilderimen áńgimelesti.

Keıin Memleket basshysy Sherhan Murtaza atyndaǵy Halyqaralyq Taraz ınnovatsııalyq ınstıtýtynyń Stýdentter úıinde oqý ornynyń oqytýshylarmen jáne stýdenttermen kezdesti.

Baızaq aýdanynyń Kóktal aýyldyq orta mektebiniń jumysymen tanysqan Qasym-Jomart Toqaev ustazdar qaýymymen júzdesip, jańa ári jaıly mektepte bilim alyp jatqan oqýshylarǵa tabys tiledi.

Baızaq aýdany Myrzataı aýylyndaǵy «Áýlıe Ata Fenıks» qus fabrıkasynda tsehtardy aralap kórdi.

Foto: akorda.kz