Memleket basshysy halyqaralyq táýelsiz baqylaýshylardyń bir tobyn qabyldady

Bul týraly QR Prezıdentiniń baspasóz qyzmeti habarlap otyr.

Kezdesýdi ashqan Nursultan Nazarbaev prezıdenttiń kezekten tys saılaýyna halyqaralyq baqylaýshy retinde kelgen qonaqtarǵa alǵysyn aıtty.

-Saılaý - bul emtıhan, jasalǵan jumystyń baǵasy. Ózderińiz biletindeı, ótken jyldyń sońynda meniń ókilettigimdi 2020 jylǵa deıin uzartý jónindegi referendým ótkizý bastamasy aıtyldy. Bes jarym mıllıonǵa jýyq qol jınalǵan edi. Bizdiń halqymyzdyń erik-jigeri men múddesin eskerip, sondaı-aq demokratııalyq ustanymdarǵa adaldyq tanyta otyryp, men prezıdenttiń kezekten tys saılaýyn ótkizý týraly sheshim qabyldadym», - dep atap ótti Memleket basshysy.

Eýropalyq Parlament depýtaty, Ortalyq Azııa men Mońǵolııa boıynsha Eýropalyq Parlament delegatsııasy basshysynyń orynbasary Alfred Rýbıks ótken saılaý barysyna joǵary baǵa berdi.

-Sizderdiń elderińizde Prezıdent saıasatyn jastardyń qalaı qoldaıtyndyǵyn kórý jaqsy áser týǵyzdy. Qazaqstan halqy óz Elbasyna daýys beretindigin atap ótti, - deıdi jýrnalıstermen bolǵan brıfıngde A.Rýbıks.

Ulybrıtanııa Parlamenti Lordtar palatasynyń múshesi Lord Ýeıverlı saılaý halyqaralyq talaptarǵa saı ótkendigine toqtaldy.

-Jalpy alǵanda, Qazaqstan egemendiktiń 20 jylynda úlken jeńisterge qol jetkizgen Ortalyq Azııada moıyndalǵan kóshbasshy dep aıta alamyn, - dedi Lord Ýeıverlı.

-Men Qazaqstanǵa birneshe ret kelgemin jáne elderińizde qandaı ózgerister bolyp jatqanyn kórip otyrmyn. Eń mańyzdy is-sharalar qataryna byltyrǵy jyly Qazaqstannyń EQYU-ǵa tóraǵalyq etýin jatqyzýǵa bolady. Qazaqstannyń halyqaralyq arenadaǵy bedeli artyp keledi. Biz Qazaqstannyń osy baǵytta óz jumysyn jalǵastyra berýine tilektespiz, - dep atap ótti Frantsııa Parlamentiniń senatory Eımerı de Monteskıý.

Ispanııa Parlamentiniń vıtse-spıkeri Hýan Hose Lýkas Hımenes saılaýǵa halyqtyń kóptep kelgenin, ásirese jastardyń belsendilik tanytqanyn atap ótti.

-Biz kelesi jylǵy saılaýdyń baqylaý úrdisine qýana qatysamyz, ol saılaý da osyndaı jumys jaǵdaıynda ótip, Qazaqstannyń demokratııalyq ustanymdarynyń nyǵaıýy men kóppartııalyq basqarýyna kýá bola alady dep úmittenemin, - dep atap ótti H.Lýkas Hımenes.

-Prezıdenttiń saılaýy óte jaqsy ótkenine kúmánim joq. Eń bastysy, saılaý Qazaqstan halqynyń kóńil-kúıi men erik-jigerin kórsetti. Biz 65 saılaý ýchaskesinde bolyp, júzdegen saılaýshymen, úkimettik emes uıym, 9 saıası partııa ókilderimen kezdestik. Jáne de olardyń barlyǵy saılaýdy Qazaqstan bolashaǵymen baılanystyratyndyqtaryn jetkizdi, - dedi Investıtsııa jáne salyq jónindegi Halyqaralyq ortalyqtyń prezıdenti Denıel Alan Vıtt.

«Djeımstaýn» qorynyń bas sarapshysy Vladımır Sokor atap ótkendeı, Qazaqstan demokratııanyń evolıýtsııalyq damýynyń jaqsy úligisin kórsetti. Oǵan turaqtylyq pen prezıdenttiń myqty bıligi kýá bola alady.

-Biz Prezıdent Nazarbaevtyń qaıta saılanýyn halyqtyń, memlekettiń tabysy retinde baǵaladyq, - dep málim etti V.Sokor.

Halyqaralyq baqylaýshylar Memleket basshysyna syndarly kezdesý ótkizgeni úshin alǵys bildirdi.