Memleket basshysy Eýropalyq Keńes Prezıdentimen Aýǵanstandaǵy jaǵdaıdy talqylady
Prezıdentter Aýǵanstandaǵy qazirgi jaǵdaı boıynsha jan-jaqty pikir almasty. Qasym-Jomart Toqaev Sharl Mısheldiń suraýy boıynsha, Qazaqstannyń aýǵan máselesine qatysty ustanymyn bildirdi. Memleket basshysy álemdik uıymǵa qoldaý kórsetý maqsatymen BUU-nyń Aýǵanstandaǵy keńsesin Almatyda ýaqytsha ornalastyrý týraly sheshim qabyldanǵanyn habarlady.
Qasym-Jomart Toqaev Qazaqstandaǵy aýǵan stýdentterine de tıisti kómek kórsetilip jatqanyn aıtty. Memleket basshysy aýǵan máselesine qatysty, sonyń ishinde Aýǵanstanda da Qazaqstan men Eýropalyq Keńes tyǵyz qarym-qatynas ornata alady dep esepteıdi. Qazaqstan Eýropalyq Odaq elderiniń azamattaryn evakýatsııalaǵan ushaqtarǵa óz áýejaılarynda janar-jaǵar maı quıýǵa múmkindik jasaǵany týraly aıtyldy.
Taraptar zańsyz mıgratsııa, esirtki tasymaly, adam jáne qarý-jaraq saýdasynyń aldyn alý boıynsha yntymaqtastyq ornatýǵa múddeli ekenin bildirdi. Qazaqstannyń dıplomatııalyq jáne ózge de salalyq vedomstvolary atalǵan máseleler boıynsha Eýropalyq Keńeske konsýltatıvtik kómek bere alady.
Memleket basshysy Aýǵanstanda barlyq etnostyq toptardyń qatysýymen ınklıýzıvti úkimet qurylǵannan keıin jaǵdaıdyń turaqtalatynyna úmittenedi. Buǵan soǵystan zardap shegip otyrǵan barlyq aýǵan halqy múddeli.
Eýropalyq Keńestiń Prezıdenti mazmundy suhbatqa rızashylyǵyn bildirip, aýǵan taqyrybyndaǵy kóp másele boıynsha kózqarastarynyń ortaq ekenin atap ótti. Sharl Mıshel Qasym-Jomart Toqaevtyń jyl sońyna deıin bolatyn Brıýsselge sapary barysynda jeke kezdesetinine senim bildirdi. Sol saparda Qazaqstan men Eýropalyq Keńestiń yntymaqtastyǵy boıynsha kún tártibindegi aýqymdy máseleler jóninde jan-jaqty pikir almasatynyn aıtty.
