Memleket basshysy Eýrazııalyq úkimetaralyq keńes múshelerimen kezdesti
Kezdesýge Qazaqstan Respýblıkasynyń Premer-Mınıstri B.Saǵyntaev, Armenııa Respýblıkasynyń Premer-Mınıstri K.Karapetıan, Belarýs Respýblıkasynyń Premer-Mınıstri A.Kobıakov, Qyrǵyz Respýblıkasynyń Premer-Mınıstri S.Jeenbekov, Reseı Federatsııasy Úkimetiniń tóraǵasy D.Medvedev, Eýrazııalyq ekonomıkalyq komıssııa alqasynyń tóraǵasy T.Sarkısıan qatysty.
Nursultan Nazarbaev Eýrazııalyq úkimetaralyq keńes músheleriniń elordaǵa kelgenderine qýanyshty ekenin jetkizip, kezdesýdiń Astana qalasyndaǵy «EKSPO-2017» halyqaralyq kórmesimen tuspa-tus ótip otyrǵanyn aıtty.
«Úkimetter basshylarynyń óz memleketiniń ulttyq pavılondaryna barýǵa, sondaı-aq Qazaqstan men ózge elderdiń ekspozıtsııalaryn aralap kórýge múmkindikteri bar. Eýrazııalyq ekonomıkalyq odaqtyń úshinshi jyl jumys istep jatqanyn atap ótken jón. Bul kezeń álemdegi jáne odaqqa múshe elderdiń ulttyq ekonomıkasyndaǵy kúrdeli ahýaldarǵa baılanysty bolyp otyr. Sonymen qatar, ortaq naryq pen biryńǵaı ekonomıkalyq qurylym qurý basty faktor bolyp sanalady, - dedi Qazaqstan Prezıdenti.
Memleket basshysy ekonomıkanyń ósimi elder arasyndaǵy taýar aınalymynyń artyp, ózara qarym-qatynastardyń nyǵaıýyna tikeleı baılanysty ekenin aıtty.
«Biz osy ýaqyt ishinde durys baǵytta ilgerileı aldyq dep esepteımin. Qazir oryn alyp otyrǵan birqatar máselege qaramastan, Eýrazııalyq ekonomıkalyq odaqty nyǵaıtýymyz qajet. Aldymyzda el ishindegi máselelerdi sheship, ózara qarym-qatynasymyzdy odan ári damyta túsý mindeti tur. Bul jumystaǵy negizgi róldi úkimetterimiz atqarady. Bul degenimiz - ekonomıkalyq mindetterdi sheshý, memleketter arasyndaǵy ózara is-qımyl máselelerin retteý, - dedi Nursultan Nazarbaev.
Sońynda Qazaqstan Prezıdenti keńestiń búgingi otyrysy arqyly uıymdy ári qaraı damytýǵa mańyzdy úles qosylatynyn atap ótip, qatysýshylardyń jumysyna jemis tiledi.
