Memleket basshysy elimizdiń batys óńirin senimdi elektr jelisimen qamtýdy tapsyrdy
NUR-SULTAN. QazAqparat – Elimizdiń batys óńiri senimdi elektr jelisimen qamtylýy tıis. Bul týraly búgin Atyraý oblysynyń áleýmettik-ekonomıkalyq damý máseleleri jónindegi keńeste Memleket basshysy Qasym-Jomart Toqaev aıtty, dep habarlaıdy QazAqparat tilshisi.
«Besinshi – óńirdiń turaqty energııamen jabdyqtalýy. Bul máseleni sheshpeı oblystyń tabysty damýy múmkin emes. Oblys elektr energııasymen senimdi jáne tolyq kólemde qamtamasyz etilýi tıis. Ázirshe, bul baǵytta problemalar bar. Energetıka jelisindegi apattyq irkilis Atyraý munaı óndirý zaýytynyń toqtaýyna alyp keldi. Óz kezeginde bul janar-jaǵarmaı naryǵyndaǵy ahýaldyń nasharlaýyna sebep boldy», - dedi Memleket basshysy.
Qasym-Jomart Toqaev óziniń tapsyrmasymen elimizdiń batys oblystary arasyndaǵy tranzıttik baılanystardy kúsheıtý jáne olardy Qazaqstannyń biryńǵaı elektr júıesimen biriktirý syzbasy ázirlenip jatqandyǵyn atap ótti.
«Tolyqtaı alǵanda, Úkimetten batys óńirdiń elektr jelisiniń senimdi jumys isteýin arttyrý boıynsha keshendi is-sharalardy qabyldaý talap etiledi», - dedi QR Prezıdenti.
