Memleket basshysy elimizdegi kadrlyq taǵaıyndaýlarǵa qatysty túsinik berdi

NUR-SULTAN. QazAqparat – «Habar» telearnasyna suhbat bergen Memleket basshysy Qasym-Jomart Toqaev elimizdegi sońǵy kadrlyq taǵaıyndaýlarǵa qatysty túsinik berdi, dep habarlaıdy QazAqparat tilshisi.

Prezıdent qyzmet etip júrgen kadrlardy tolyqtaı jumysynan shettetý tájirıbesine qarsy ekenin aıtty. Kadrlardy biliktiligine, jumysty atqarý sapasyna qaraı baǵalaý kerek. Osy oraıda Memleket basshysy Úkimetti 100 paıyz aýystyryp, ózińdi revolıýtsıoner retinde jarııa etip, kópshiliktiń aldynda osyndaı áreketter jasaýdy qoldamaıtynyn jetkizdi.

«Bul máselede laıyqty mınıstrlerdi irikteý kerek. Qyzmetkerdi «kósheden» taǵaıyndaýǵa bolar edi. Álemdik tarıhta osyndaı jaǵdaılar kezdesken bolatyn... Atap aıtqanda, kadrlar máselesine óte saqtyqpen qaraý kerek», - dedi Qasym-Jomart Toqaev.

Prezıdent jumysynda jaýapkershiligi joqtary qyzmette júre bermeıtinin atap ótti.

«Árıne, bolashaqta ózgerister bolady. Bul qadamdar jan-jaqty pysyqtalǵan, oılastyrylǵan negizde jasalady», - dedi Memleket basshysy.