Memleket basshysy: Eldiń tótenshe jaǵdaıǵa daıyndyǵy – 70 paıyz ǵana
Memleket basshysynyń sózine qaraǵanda, byltyr Qostanaıda daıyndyq deńgeıi tómen ekeni belgili bolǵan.
«Úshinshiden, byltyr Qostanaıda bolǵan órt kezinde men azamattyq qorǵaý jáne atqarýshy bılik organdarynyń tótenshe jaǵdaılarǵa naqty daıyndyǵyna tekserý júrgizýdi tapsyrdym. Orman jáne dala órtin sóndirý úshin órtke qarsy tehnıkalyq qural-jabdyq qorlaryn qalyptastyrý tapsyryldy. Daıyndyq deńgeıi tómen ekeni anyqtaldy. Atap aıtqanda, materıaldyq-tehnıkalyq jaraqtandyrý kórsetkishi – 69%, fýnktsıonaldyq ınfraqurylym kórsetkishi – 63%. Jalpy, ortalyq jáne jergilikti atqarýshy organdardyń tótenshe jaǵdaılarǵa daıyndyǵy – 70% (Tótenshe jaǵdaılar mınıstrligi – 75,1%, Ekologııa jáne tabıǵı resýrstar mınıstrligi – 59,5%, jergilikti atqarýshy organdar – 70,2%). Úkimet daıyndyq kórsetkishterin tótenshe jaǵdaılarǵa tıisti dárejede tótep beretin deńgeıge jetkizýi qajet. Álemde bir de bir memleket kóp kásibı órt sóndirýshini ustap tura almaıdy. Eriktiler otrıadtaryn tartý tájirıbesi keńinen qoldanylady jáne olardy oqytady, qural-jabdyqtarmen qamtamasyz etedi jáne saqtandyrý sharalary qarastyrylady. Bizde de bul normalar zań júzinde qarastyrylǵan. Biz bul resýrsty belsendi paıdalanýymyz kerek», - deıdi Qasym-Jomart Toqaev.
Prezıdenttiń aıtýynsha, jazdyń ystyǵy endi ǵana bastaldy. Kez kelgen ýaqytta órt shyǵýy múmkin.
Sondaı kezde órtke tótep berý úshin daıyndyq saqadaı saı bolýǵa tıis. Úkimet osyǵan baılanysty shuǵyl sharalar qabyldaýy kerek.
«Orman alqaptaryna kelip, qaýipsizdik erejelerin buzǵan azamattardy qylmystyq jaýapkershilikke tartý kerek. Olar ot jaǵyp, ony óshirmeı ketedi, bul qaıǵyly jaǵdaıǵa alyp keledi. Osymen jınalys aıaqtaldy. Dereý iske kirisý qajet», - dep túıindedi Memleket basshysy.
