Memleket basshysy densaýlyq saqtaý salasyn tsıfrlandyrý jumystarynyń tejelgendigin aıyptady
NUR-SULTAN. QazAqparat – Koronavırýs indetiniń ekinshi kezeńine daıyndyq máseleleri boıynsha keńeste Memleket basshysy Qasym-Jomart Toqaev densaýlyq saqtaý salasyn jedel tsıfrlandyrýdy tapsyrdy, dep habarlaıdy QazAqparat tilshisi.
«Búginde birqatar tapsyrmany oryndaý asyra silteýshilik baıqalady. Aıtalyq, «SQ-Farmatsııa» men Medıtsınalyq saqtandyrý qory boıynsha qylmystyq tergeýge baılanysty densaýlyq saqtaýdy tsıfrlandyrý is júzinde toqyrap qaldy. Qazirgi ýaqytta Qarjy mınıstrligi Qarjylyq monıtorıng komıtetiniń qylmystyq isti tergeý jáne sotqa deıingi tekserýi aıasynda Densaýlyq saqtaýdyń ıntegratsııalyq tuǵyrnamasyna qandaıda bir ózgertýler engizýge baǵyttalǵan barlyq is-áreket toqtap tur», - dedi QR Prezıdenti.
Memleket basshysynyń atap ótýinshe, qazirgi jaǵdaıdaǵy ıntegratsııalyq tuǵyrnama málimetterin tirkeý arqyly ıntegratsııalyq tuǵyrnamany almaı jáne ıntegratsııalyq protsesterdi toqtatpaı-aq qylmystyq tergeý júrgizýge tehnıkalyq múmkindik bar.
«Bul memlekettik organdardyń kelisilmegen is-áreketin bildiredi. Olardyń árqaısysy vedomstvolyq múddeni aldyǵa qoıyp otyr. Ásirese qazirgi ýaqytta bul múlde jol berýge bolmaıtyn jaǵdaı. Málimetterdi jınaý qol kúshimen júrgizilýde. Medıtsınalyq uıymdar arasynda aqparat almasý, indet boıynsha tolyq tsıfrlyq kartına joq. Úkimetke, Prezıdent ákimshiligine qysqa ýaqyttyń úshinde atalǵan problemany sheshý qajet. Buǵan qosa, medıtsınany tsıfrlandyrý, málimetter bazasyn ıntegratsııalaý, úıde em alyp jatqan patsıentterge monıtorıng júrgizý júıesin qurý úshin jaýapkershilikti eshkim de alyp tastaǵan joq. Kúni keshe Tsıfrlyq damý mınıstrin qabyldadym. Ol maǵan densaýlyq saqtaýdy tsıfrlandyrýdyń jańa ádisteri týraly baıandady. Olardy is júzinde júzege asyrýǵa kirisý qajet dep sanaımyn. Jalpy, jospar jaqsy. Endi ony júzege asyrý qajet», - dedi Qasym-Jomart Toqaev.
