Memleket basshysy Densaýlyq saqtaý mınıstrine on jastaǵy naýqas qyzdyń emdelýin qadaǵalaýdy tapsyrdy
A. Qarashanyń 13-i. QazAqparat /Qanat Mámetqazyuly/ ‑ Búgin respýblıkalyq telearnalar boıynsha ótip jatqan tikeleı jelide el azamattarynan kelip túsken suraqtarǵa jaýap berý barysynda Qazaqstan Respýblıkasynyń Prezıdenti Nursultan Nazarbaev aýyr naýqastanǵan on jastaǵy Nastıanyń emdelýin qadaǵalaý týraly Densaýlyq saqtaý mınıstrine tapsyrma berdi,
dep habarlaıdy QazAqparat.
Buǵan deıingi óziniń atyna joldanǵan saýaldar boıynsha Elbasy tıisti organdarǵa tapsyrmalar júktep otyrǵan bolatyn. Máselen, ata-anasynyń qamqorynsyz, ájesiniń qolynda qalǵan on jastaǵy Nastıanyń hatyna N. Nazarbaev nazar aýdarǵan edi. Nastıanyń naýqasy aýyr bolyp, oǵan uzaq ýaqyt boıy ári qymbatqa túsetin em qabyldaý qajettigi aıtylǵan. Memleket basshysy osyǵan oraı Densaýlyq saqtaý mınıstrligine tapsyrma bergen bolatyn. Búgingi kúni atalǵan mınıstrlikten Nastıany emdeýge kvota bólingenin habarlady.
«Bul jaǵdaı týraly bilemin. Densaýlyq saqtaý mınıstrine de osyǵan oraı tapsyrma bergen edim. Sondyqtan da, mınıstrge Nastıanyń máselesin tolyq qadaǵalaýǵa alyp, atqarylǵan sharalardy maǵan tikeleı baıandaýdy tapsyramyn. Nastıaǵa qoldan kelgenshe kómektesý kerek», dedi N. Nazarbaev.
